Këshilli i Lartë Gjyqësor ka shkarkuar nga detyra gjyqtaren Enkelejda Hoxha. KLGj vendosi të pranojë kërkesën e kreut të ILD-së, Artur Metani për shkarkimin e gjyqtares.
Prej javësh Enkelejda Hoxha po mbahet në arrest pasi mbi të rëndojnë akuzat për korrupsion. Vendimi i ditës së sotme mësohet se nuk ka pasur diskutime, pasi palët ishin shprehur më herët.
Kreu i Inspektoriatit të Lartë të Drejtësisë, Artur Metani ka dhënë argumentin se gjyqtarja Enkelejda Hoxha ka shkleur rëndë ligjin kur ka liruar nga burgu të dënuarin Hekuran Billa. Vetë gjyqtarja Hoxha e ka pranuar se kishet gabuar në rastin e Hekuran Billës me pretendimin se shkeljet nuk janë në masë aq të rëndë sa për shkarkim nga detyra dhe propozoi nje pezullim dy vjeçar.
Ish-gjyqtarja e Krujës, Enkelejda Hoxha është arrestuar në 11 shkurt në urdhër të SPAK me akuzën e korrupsionit. Po ashtu në pranga kanë rënë edhe 9 persona të tjerë që ishin të përfshirë në skemën e lirimit të të burgosurve të dënuar për vepra të rënda penale kundrejt shumave të majme që shkonin nga 6 mijë deri në 12 mijë euro. Në skemë ishin përfshirë drejtorë burgjesh, psikologë e ekspertë mjeko-ligjor. Ish- gjyqtarja Hoxha ka kërkuar disa herë lirimin me argumentin se ajo duhet të kujdeset për fëmijët e saj të mitur, një prej të cilëve me probleme shëndetësore.
