Në mëngjesin e sotëm, avokati Gylsen Zhllima ishte i ftuar në emisionin “Koha për t’u zgjuar”, ku trajtoi çështjen e lirimit dhe dorëzimit të pronës tek pronari.
Ai theksoi se qytetarët duhet të jenë të kujdesshëm dhe t’i drejtohen gjykatës civile për raste të tilla, dhe jo prokurorisë apo policisë, pasi këto institucione nuk kanë atributet e nevojshme për të trajtuar denoncime të tilla.
Për pasojë, denoncimet e bëra tek këto institucione mbeten të pavlefshme. Zhllima gjithashtu sqaroi disa raste që lidhen me konflikte që ndodhin si pasojë e shkeljes së kushteve të kontratave të qiramarrjes dhe kërkesave për lirim prone pas ndryshimit të kushteve nga ana e pronarit.
“Duke marrë parasysh Kodin tonë Civil, sa i përket lirimit dhe dorëzimi i sendit, makinë, apartament, ka raste kur personi posedues refuzon ta dorëzojë pronën.
Nuk do të bëjmë vetëgjyqësi, por do të drejtohemi në gjykatën civile ku do të bëjmë padi. Më pas duhet pritur vendimi i formës së prerë nga gjykata, në rast se mosmarrëveshja nuk zgjidhet paraprakisht.Lirimi dhe dorëzimi i sendit ka të bëjë edhe me kontratat siç është për shembull ajo e qerave. Kemi parë në kontrata vendosjen e kontratave me afat të gjatë, psh 10-vjeçare. Këshilloj afat më të shkurtër 2 ose 3 vite. Kjo pasi tregu ndryshon dhe kushtet e secilit ndryshojnë me kalimin e kohës. Nëse një nga palët shkelin më shumë se një kusht të kontratës, mban përgjegjësi.
Këto procese zgjasin goxha në kohë, deri në 3-4 vite, pasojë kjo e një reforme të pa studiuar. Më pas kalohet tek përmbaruesi.
Kemi pasur raste që bëhen kallëzime në prokurori dhe polici, këto janë veprime nul, sepse këto institucione nuk bëjnë dot vetëgjyqësi, ndryshe do të shpërdoronin detyrën, nuk kanë atribute të detyrojnë dikë të lirojë sendin, është konflikt civil dhe duhet padi civile”, u shpreh ai.
