3 maji njihet si dita Botërore e Lirisë së Shtypit. Në kuadër të kësaj dite Ambasadori i Bashkimit Evropian në Tiranë, Luigi Soreca, ka dhënë një mesazh në “Twitter”. Në mesazhin që përcjell Soreca thekson se liria e shtypit është themeli i shoqërive demokratike dhe mund të jetoj vetëm në qoftë se qytetarët kanë qasje në informacion të besueshëm. Gjithashtu qytetarët kanë të drejtën për të bërë zgjedhjen e tyre se ku duhet të informohen. Sipas ambasadorit Soreca liria e shtypit do të thotë siguri për të gjithë.
“Liria e shtypit është një gur themeli i shoqërive demokratike, e cila mund të lulëzojë vetëm nëse qytetarët kanë qasje në informacion të besueshëm dhe mund të bëjnë zgjedhje të informuara. Liria e shtypit do të thotë siguri për të gjithë”, shkruan Soreca.
Kujtojmë se në shoqëritë e zhvilluara demokratike, pse jo dhe në tërësinë e zhvillimit të shoqërive informacioni ka qenë dhe mbetet baza e komunikimit njerëzor, e në këtë kontekst mediat dhe teknologjitë e komunikimit, janë shndërruar tashmë në bazë të fuqishme të ekzistencës së vetë njerëzimit. Nga Asambleja e Përgjithshme e Kombeve të Bashkuara dita e 3 majit është shpallur Dita Botërore e Lirisë së Shtypit për të ngritur vetëdijen dhe rëndësinë e lirisë së shtypit dhe për t’ua kujtuar popujve dhe qeverive detyrën që kanë në drejtim të respektimit të drejtës së shprehjes së lirë, që është e garantuar me nenin 19 të Deklaratës së Përgjithshme të të Drejtave të Njeriut. Shoqëria njerëzore, sot është bombarduar nga informacioni 24 orë pa ndërprerje. Kronikat, lajmet, opinionet, vijnë drejtpërdrejtë nga vendi i ngjarjes, ndërsa interneti nga ana e tij është shndërruar në një pompë benzine. Nëse i referohemi zhvillimit spektakolar në fushën e komunikimit dhe informacionit, rezulton se sot ka inflacion në këtë aspekt. Shoqëria shqiptare fatkeqësisht pas një periudhe relativisht të gjatë të totalitarizmit, ka trashëguar tipe organizimi shoqëror, ku ka dominuar modeli i shoqërive të mbyllura.
