Ligji i ri për shkencën, i miratuar nga Kuvendi, ka rikthyer në një farë mase autonominë dhe lirinë akademike për universitetet, duke shmangur kontrollin e drejtpërdrejtë nga Akademia e Shkencave.
Ky ndryshim vjen pas kundërshtive të shumta nga universitetet dhe stafet akademike, të cilët shprehën shqetësim se drafti fillestar i propozuar nga Ministria e Arsimit i jepte Akademisë së Shkencave më shumë fuqi, në kurriz të institucioneve të arsimit të lartë.
Artan Hoxha, kryetari i Konferencës së Rektorëve dhe rektori i Universitetit të Tiranës, u shpreh se universitetet arritën të ruajnë një shkallë të lirisë akademike dhe pavarësinë nga Akademia e Shkencave.
Megjithatë, ai pranoi se ligji i ri ende nuk përfaqëson një model ideal për zhvillimin e shkencës në vend, në krahasim me standardet e vendeve europiane.
Një nga aspektet e diskutueshme të këtij ligji mbetet roli i Këshillit Kombëtar të Shkencës, i cili do të drejtohet nga kryeministri. Pavarësisht ndryshimeve të kërkuara nga universitetet, ato përfunduan në një minorancë përballë politikës, me një anëtar të shtuar në këshill, por pa shumicë.
Ligji i ri pasqyron një kompromis, ku universitetet arritën një liri të kufizuar, ndërsa Akademia e Shkencave ruajti pozitat dhe fuqinë e saj të zgjeruar me institucionet e veta kërkimore.
