Komisioni i Ekonomisë ka zhvilluar sot mbledhjen e radhë online, ku është diskutuar lidhur me disa ndryshime në ligjin për Prokurimet Publike.
Mësohet se ligji i ri do të prezantojë disa koncepte të reja në fushën e tenderave. Qeveria do të marrë përsipër që të ndërtojë një sistem të qendërzuar të operuar nga Inteligjenca Artificiale, që do bëjë në mënyrë automatike vlerësimin e kritereve si dhe më pas zgjedhjen e fituesit të tenderit.
Po ashtu, ligji i ri do të përjashtojë operatorët që nuk kanë të regjistruar një pronar përfitues, si dhe ata të dënuar me vendim gjykate.
Përjashtohen automatikisht kompanitë që do të kapen në shkelje me pagat e punonjësve.
Ligji parashikon edhe ngritjen e një Organi Qendror Blerës në varësi të Këshillit të Ministrave, që ka të drejtën t’u marrë enteve prokuruese të drejtën e zhvillimit të një gare.
Ndryshime ka edhe për afatet e ankimimit dhe skualifikimit të një operatori nga gara.
