Kryeministri Edi Rama, gjatë mbledhjes së sotme të qeverisë, kërkoi nga ministrja e Drejtësisë, Etilda Gjonaj dhe Komisioni i Ligjeve, që brenda datës 19 dhjetor, të kenë gati ligjin e posaçëm për rindërtimin.
Shefi i qeverisë bëri me dije se sot do të udhëtojë drejt Bratislavës, për të marrë Presidencën e OSBE dhe më pas do të ndalojë në Turqi, ku do të zhvillohet një konferencë donatorësh, për të ndihmuar të prekurit nga tërmeti.
“Shqipëria merr presidencën e OSBE-së dhe duhet të shkoj sot në Bratislavë për të marrë detyrën. Pastaj nesër do shkoj në Stamboll në takimin e madh që ka organizuar presidenti me donatorë e biznesmenë, ndërkohë që po përgatitemi dhe për konferencën e donatorëve të rajonit verilindor. Unë i kam thënë besoj do kthehem me çadra me vete. Por të kemi parasysh organizimin e gjithë kësaj logjistike. Ka vlerë të madhe për të qenë pjesë e gjithë logjistikës sonë tonë në vijim”, tha kreu i qeverisë.
Gjithashtu Rama kërkoi ashpërsimin e dënimit, për shpifjen në gjendjen e jashtëzakonshme.
Sipas tij, lajmet e rreme në këtë situatë janë kriminale.
“Mendoj që në këtë seancë duhet të përcaktojmë një klauzolë të veçantë në ligjin e antishpifjes që besoj do të hyjë në seancë në datën 19 më në fund për gjendjen e jashtëzakonshme. Shpifja në gjendjen e zakonshme është e dënueshme, shpifja në gjendje të jashtëzakonshme duhet të jetë e superdënueshme. Lajmet e rreme dhe lodrat mediatike në situata si kjo që kaluam, janë kriminale. Mjafton rasti i Durrësit, një lajm kriminal i shëprndarë se po bie spitali i Durrësit, solli një të vdekur, pa llogaritur kaosin dhe të plagosurit në përpjekjen për të ikur me vrap nga spitali. Spitali nuk kishte asgjë. Janë gjëra që duhet të dënohen fort”, deklaroi Rama.
Më tej kreu i qeverisë u shpreh, se do të kërkojë fuqi punëtore nga jashtë për të përballuar situatën.
