Gazetari Ergys Myrta ka bërë publike detaje të reja në lidhje me arrestimin e gjyqtares së Krujës, Enkelejda Hoxha. I ftuar në Fax News ai ka thënë se mes gjyqtares Hoxha dhe avokatit Aldo Tabaku mund të ketë pasur më shumë se një marrëdhënie pune. Myrta ka thënë se Tabaku ka bërë rezistencë në momentin që zyra e tij do të kontrollohej.
“Gjatë hetimeve ka rezultuar një person që ka negociuar për lirimin e shtetasit Sajmir Metani, i cili ka qenë i dënuar me 25 vite burg, nga gjykata e Shkodrës, i akuzuar për një vrasje që ka ndodhur në vititn 1995. Në muajin Tetor gjyqtarja i ka ulur 6 muaj dënim këtij shtetasi, ndërsa avokati i tij mbrojtës ishte Aldo Tabaku. Sipas dosjes hetimore thuhet se avokati Tabaku ka pasur një marrëdhënie shumë të ngushtë me gjyqtaren, ai ka bërë rezistencë që të mos kishte kontroll në zyrën e tij, dhe ka pasur përplasje fizike”, tha Myrta.
Ndër të tjera, Myrta ka treguar se emri i mjekut Edvin Prifti është përfshirë në dosje në mënyrë aksidentale. Kjo pasi sekretarja e gjykatës së Krujës Manuela Mallkuçi ka tentuar t’i jap një rryshfet prej 2 mijë eurosh për një opreacion, por nuk dihet nëse mjeku e ka pranuar.
“Pjesa e dosjes së shëndetësisë ka qenë aksidentale, pasi sekretarja Manuela Mallkuçi kishte dhënë një rryshfet prej 2 mijë eurosh që të bënte një operacion në QSUT. Nuk saktësohet në dosje nëse Prifti e ka marrë sasinë e parave, për të cilën kishte komunikuar me sekretaren e gjykatës.”- ka thënë Myrta.
