Bizneset në tension të mesëm të lidhur në 20,10 apo 6 kilovolt, të cilët që prej fillimit të vitit të shkuar po trajtohen me çmim preferencial, kanë konsumuar 1 miliard kWh energji.
Me nisjen e procesit të daljes në treg të lirë të paktën 7600 kompani u përballën me çmime të kripura në tregun e parregulluar dhe falë rezistencës së tyre u mbajtën nga qeveria me një çmim pjesërisht të liberalizuar. Çmimi i tyre mesatar për vitin 2022 ishte 18.58 lekë/kWh që është 70 për qind më i lartë se ai që kishin në tregun e rregulluar.
“Referuar bilancit energjetik rezulton se sasia e energjisë së konsumuar nga klientët e lidhur në nivelet e tensionit 20/10/6 kV për vitin 2022 është 1,079 GWh me një vlerë të faturuar prej afro 20,058 milion lekë” thuhet në raport.
Pra, shteti këto biznese në tension të mesëm i ka faturuar 175 milionë euro por nëse nuk do të trajtoheshin me çmim preferencial atëherë fatura do të ishte 40 për qind më e lartë pasi nëse i referohemi raportit vjetor të Entit Rregullator të Energjisë bizneset e lidhur në 35 kilovolt blenë energjinë me një çmim mesatar 32.11 lekë/kWh.
Çmimi më i lirë që u sigurua për këto biznese erdhi si efekt i një marrëveshjeje mes kompanive publike ku Korporata Elektroneneërgjetke Shqiptare sasinë e energjisë të destinuar për këtë grup e shiste tek OSHEE me një çmim 12 lekë/kwh.
Procesi i liberalizimit
Liberalizimi me kategorinë 35 kilovolt nisi në vitin 2018 ku ishin të paktën 96 subjekte të lidhur në këtë nivel tensioni. Më pas faza tjetër e liberalizimit nisi në 2022.
“Me njoftimin nga Operatori i Sistemit të Shpërndarjes për plotësimin e kushteve teknike për daljen në treg të liberalizuar të klientëve të lidhur në tension të mesëm 20/10/6 kV, në zbatim të ligjit 43/2015 “Për sektorin e elektrike”, i ndryshuar, duke filluar nga data 1 janar 2022, ERE ka publikuar në faqen elektronike të saj njoftimin e mësipërm si dhe ka rikujtuar të drejtën e këtyre klientëve për të zgjedhur lirshëm furnizuesin e tyre. Gjithashtu, u qartësua se në pamundësi të sigurimit të një marrëveshje furnizimi me një nga subjektet e licencuara në këtë aktivitet, klientëve iu lind e drejta e furnizimit me energji elektrike nga Furnizuesi i Mundësisë së Fundit.
Në zbatim të vendimit të Asamblesë së Përgjithshme të aksionarit, shoqëria KESH sh.a. furnizoi të gjithë sasinë e kërkuar të energjisë elektrike për klientët e FSHU sh.a., përfshirë këtu edhe klientët të lidhur në nivelet e tensionit 20/10/6 kV, të cilët u gjendën në kushtet e furnizimit të mundësisë së fundit pas datë s1 janar 2022. Kosto e blerjes së sasisë së energjisë për mbulimin e kërkesës së kësaj kategorie klientësh të përcaktuar në vendimin sipërcituar, ishte ajo prej 12 lekë/kWh” sqaron Enti.
Këto biznese parashikohet që të mbrohen me një çmim preferencial deri në momentin e zbehjes së krizës së energjisë të paktën sipas premtimit të qeverisë në tryezat e mbajtura me bizneset./ MONITOR
