Një tjetër tërmet me magnitudë 4.8 ballë të shkallës Rihter ka goditur Greqinë në orët e para të mëngjesit, duke shtuar ankthin dhe pasigurinë mes banorëve.
Shumë prej tyre kanë zgjedhur ta kalojnë natën në çadra, nga frika e lëkundjeve të mëtejshme.
Sipas të dhënave nga Qendra Europiane e Sizmologjisë, epiqendra e tërmetit ishte 24 kilometra në lindje të Oia-s, me një thellësi fokale prej 14 kilometrash.
Ndërkohë, autoritetet në Santorini mbeten në gatishmëri të plotë, pasi aktiviteti sizmik në këtë zonë mbetet i lartë, me disa tërmete të njëpasnjëshme që kanë tronditur ishullin.
Për shkak të situatës, shumë qytetarë dhe turistë kanë filluar të largohen nga Santorini, duke përdorur si rrugët ajrore ashtu edhe ato detare. Kjo ka shkaktuar mbipopullim në portin e ishullit, ndërsa banorët ndihen të shqetësuar për pasojat e mundshme.
Pavarësisht panikut, presidenti i Organizatës për Planifikimin dhe Mbrojtjen nga Tërmetet në Greqi, Efthimis Lekkas, ka bërë thirrje për qetësi, duke theksuar se nuk ka rrezik për një tërmet shkatërrues si ai i vitit 1956.
“Aktiviteti sizmik që po zhvillohet tani pranë Amorgos do të zgjasë disa ditë, duke ruajtur të njëjtat përmasa. Duhen mijëra vjet për të mbushur çarjen. Nuk do të prodhojë tërmete të mëdha. Mund të shohim magnituda jo më të mëdha se 5 e shkallës Rihter. Njerëzit të mos bëjnë panik, nuk do të ketë tërmet si ai i vitit 1956”, tha Lekkas.
Nga ana tjetër, profesori i Fatkeqësive Natyrore në Universitetin Teknik të Kretës ka ngritur hipotezën se aktiviteti sizmik i shtuar midis Santorinit dhe Amorgos mund të ketë lidhje me një vullkan nënujor.
“Një mundësi është që të jetë aktivizuar një çarje, diçka e ngjashme me atë që shkaktoi tërmetin e madh të vitit 1956. Me fjalë të tjera, një vazhdimësi e thyerjes. Ky ishte tërmeti që arriti në 7.5 ballë. Por nëse një tërmet ndodh tani, nuk mendoj se dikush e pret të jetë kaq i madh. Pra, ky është një skenar. Skenari tjetër është aktivizimi i vullkanit që ndodhet brenda kalderës së ishullit të Santorinit dhe tjetri është një vullkan nënujor i quajtur Kolumbo, i cili ndodhet pak në veri të Santorinit, afërsisht 5 dhe 8 kilometra nga maja veriore e Santorinit, pra, duke shkuar drejt Ios. Aty ndodhet vullkani nënujor i quajtur Columbo. Pra, këta janë tre skenarët dhe ndikimet e mundshme që mund të kenë. Kjo është ajo që u ekzaminua në zonë.”
