Lehtësimi i masave anti-covid/ Rama tregon kur rifillojnë fluturimet, ende asnjë plan për transportin publik

Google+ Pinterest LinkedIn Tumblr +

Kryeministri Edi Rama mblodhi sot online Komitetin Teknik, ku ndër të tjera u diskutua edhe lehtësimi i masave anti-covid dhe rreziqet e mëtejshme.

Rama tha se deri në 18 maj, 90% e bizneseve do të jenë të liruara.

Megjithatë problem mbetet ende transporti publik, për të cilin nuk ka asnjë datë dhe po punohet për një formulë, që të mos rrezikohet përhapja e virusit.

“Plani është i qartë, deri në 18 do jemi 90 e kusur % të liruar. Shqetësim mbetet transporti publik me autobuz apo furgona. Po përpiqemi të gjejmë një formulë që të funksionojë. Do jemi tërësisht të ekspozuar, prandaj duhet të kemi intensitet më të madh në sensibilizim”‘, tha Rama.

Kujtojmë këtu se shoqatat e transportit janë goditur rëndë nga koronavirusi dhe i kanë parashtruar disa kërkesa Ministrisë së Infrastrukturës, por nuk kanë marrë përgjigje. (Lexo këtu)

Ata kanë paralajmëruar edhe rritje të biletës me 30% , pasi do punojnë me kapacitet të reduktuar. (Lexo këtu)

Ndërkohë përsa i përket fluturimeve, kryeministri njoftoi se pas datës 18 maj do të rifillojnë. Sa i përket kësaj pike, kreu i qeverisë, tha se personat që do të vijnë duhet të respektojnë rregullat e karantinimit në shtëpi dhe do ishte mirë që Ministria e Shëndetësisë të përgatisë disa materiale sensibilizuese.

“Do të konsultojmë me ju të gjitha masat. Deri në datë 18 janë ato që janë pastaj do të vijë procesi i hapjes dhe flukseve për të hyrë në Shqipëri nga ajri apo toka, aty do të jetë një tjetër sfidë për të respektuar rregullat e karantinimit në shtëpi për ata që do të hyjnë në Shqipëri. Do të ishte mirë që ministria e Shëndetësisë të përgatisë disa materiale sensibiluzuese për qytetarët në kushtet e rihapjes për kujdes dhe respektimin e masave” tha kryeministri.

Shpërndaje
Share.

Komento