Një ngjarje e rëndë ndodhi dy ditë më parë në Divjakë, ku Hekuran Rrasa qëlloi me armë gjahu bashkëshorten Fëllënxa Rrasa e më pas veten. Ditën e sotme është zbardhur dinamika e krimit. Sipas News 24, policia dyshon se ky është një krim i paramenduar dhe jo ashtu si është thënë nga të afërmit dhe fqinjët se ngjarja ka ndodhur pas një konflikti të çastit. Theksohet se shkak për këtë është fakti që autori i krimit, Hekuran Rrasa, para ngjarjes ka larguar nga banesa djalin e tij, duke i thënë që të shkonte të pinte një kafe dhe me pretendimin se donte që t’i blinte një paketë cigaresh.
Pasi ka larguar djalin, ai ka marrë bashkëshorten, e ka çuar te dhoma e gjumit, ku edhe e ka vrarë. Po ashtu policia dyshon se përpara se të ndodhte vrasje mes çiftit ka pasur nja konfrontim fizik, pasi rrobat e gruas janë gjetur të shqyera.
Më pas, burri e ka qëlluar gruan me armë në fytyrë, në një pjesë të dhomës së gjumit, ndërsa pak minuta më vonë është dëgjuar një krismë tjetër, ku Hekuran Rrasa ka vrarë edhe veten. Të dy trupat e pajetë janë gjetur në dhomën e gjumit. Arma e gjahut është gjetur pranë trupit të Hekuran Rrasës dhe armën ai e kishte prej shumë shumë vitesh.
