Stefan Çipa ka njoftuar përfundimin e detyrës së tij si Drejtor i Përgjithshëm i Entit Kombëtar të Banesave.
Në një postim në rrjetet sociale, Çipa shprehu falënderimet për bashkëpunëtorët dhe bëri të ditur se vendin e tij do ta zërë Besmir Hysa.
Rostimi i Stefan Çipës:
Te dashur miq!
Sot kam mbyllur detyrën si drejtor i Përgjithshëm i Entit Kombëtar të Banesave.
Ka qenë një kohë, përgjatë së cilës, çdo ditë pune, kishte intensitet. Ishte pjesë e natyrshme e jetës sime të përhershme në marrëdhëniet e punës, sipas mendësisë sime për të respektuar përherë normat, ligjet, vlerat dhe parimet e virtytshme. Krejt dekadat e mia të punës janë dominuar nga vizioni dhe parimet për ta patur ndershmërinë të njëjtë, si në ditën e parë edhe në të fundit të çdo pune.
Por koha për njeriun rrjedh dhe si pika të saj janë ditët. Kur mbyll një status social për të hyrë në një të ri, natyrshëm mendja bën bilance. Një ditë e fundit e punës, të shkakton ndjenja dhe gjendje, emocione dhe sidomos të fut në ngasjen e meditimeve.
Në këtë ditë, natyrshëm kushdo, kthen kokën pas, për të parë se çfarë është arritur dhe ç’ka mund të ishte më ndryshe!
Në udhëtimin tim dhe në karrierën time, kam pasur shumë stacione dhe befasi, ngjitje dhe ndalime, gëzime dhe brengosje, entusiazëm dhe trishtime, fatmbarësi dhe zhgënjime. Por triumfin përherë e ka pasur e mira.
Ndarja nga kjo detyrë e fundit, në drejtimin e këtij institucioni, përbën një moment të veçantë për moshën time njerëzore.
Jo për rutinë, por si natyrshmëri të vetvetes, në këtë ndarje nga stafi dhe krejt bashkëpunëtorët e mi në Entin Kombëtar të Banesave, dua të përcjell falenderimet dhe mirënjohjen time. Ka qenë një kohë e bukur punë bërëse dhe e gëzimtë për njerëz e qytetarë në skaje të ndryshme të atdheut.
Kam krenari të veçantë dhe përulem për punën e gjithë stafit përgjatë pesë viteve. Ia dolëm që EKB të transformohet në një institucion të rëndësishëm për strehimin e shtresave në nevojë.
Përmes ndërtimit të banesave me kosto të ulët, ne kemi dhuruar lumturi për familje dhe qytetarë që kanë pritur dhe kanë pasur këtë ëndërr.
Në këto 5 vite, ne ndërtuam dyfishin e apartamenteve të ndërtuara për 12 vite më parë. Ky është një rekord që më bën krenar. Ne rritëm ndjeshëm të ardhurat e institucionit nga viti në vit.
Morëm pjesë aktive në procesin e rindërtimit pas tërmetit të nëntorit 2019.
Rritëm ndjeshëm pagat e punonjësve, duke e kthyer EKB në një institucion të preferuar në administratë.
Përfundojmë çmimet e shitjes në treg të apartamenteve në gjithë vendin, e shumë, e shumë aritje të tjera.
Falenderimet e mija shkojnë për stafin e mrrekullueshëm të EKB, (në qendër dhe në drejtoritë e qarqeve).
Falenderime për mbështetjen që kemi patur nga Drejtoria e Strehimit të Ministrisë që mbulon strehimin dhe nga Anëtarët e Këshillit Drejtues dhe Kryetarët e tij.
Faleminderit, kryetarëve të bashkive me të cilët bashkëpunuam për ndërtimin e banesave me kosto të ulët.
Faleminderit Qeverisë dhe Kryeministrit për mbështetjen në zbatim të politikave të strehimit si një ndër prioritetet e tyre.
Natyrshëm i uroj suksese në detyrë, drejtorit të ri të EKB, zotit Besmir Hysa!
