Ish-nënkryetari i Lëvizjes Socialiste për Integrim, Luan Rama ka folur për herë të parë pas largimit të tij nga LSI. I ftuar ditën e sotme në emisionin “Kjo javë”, ai ka pohuar se dorëheqja ishte vendimi i duhur pas analizës së zgjedhjeve të 25 prillit.
Rama theksoi se duke analizuar rezultatin e zgjedhjeve, një drejtues duhet të marrë përgjegjësi, pavarësisht se nuk është e drejtpërdrejtë.
Ndër të tjera Luan Rama ka thënë se edhe në shkallë vendi LSI nuk ka rezultatin që meriton. Gjithashtu ai ka thënë se ka një mori faktorësh dhe elementesh LSI nuk e ka rezultatin që meriton dhe nuk e ka sipas tij votën që i japin qytetarët asaj.
“Gjatë gjithë periudhës pas zgjedhjeve i kam dhënë vetes kohë për të reflektuar, për të krijuar një distancë edhe emocionale me zgjedhjet, fushatën, problematikën. Për ta parë veten me produktin që solli angazhimi me qetësinë.
Jam ndarë, kam mbajtur një qëndrim, e gjykoj, rikonfirmoj se ka qenë qëndrimi i duhur pas analizës që i bëra vetes në LSI, në mënyrën më të drejtpërdrejtë nisi në 2010. Kam shkuar që në 2008, por në 2010 u zgjodha Sekretar dhe më pas nga 2017 zv/kryetar, sigurisht anëtar i Kryesisë dhe dy herë deputet.
Duke analizuar rezultatin e zgjedhjeve, s’mund të mos merrja përgjegjësinë që duhet të marrë drejtuesi. Ai rezultat nuk ishte përgjegjësi e drejtpërdrejtë, ka një mori faktorësh. Ka një tërësi elementësh, politikë e apolitikë, zgjedhorë e jozgjedhorë. E kam bindje që padyshim në kushtet optimale rezultati i LSI do të ishte dyfishi i votave që kam marrë. Ashtu siç e kam bindje se edhe në shkallë vendi LSI nuk ka rezultatin që meriton, s’ka votën që i japin qytetarët asaj. Sado dhe 100 mijë votat që mori, pozitiv, por ishte i kushtëzuar. Ato 1 mijë e 1 problemet e raportit të OSBE, dhunën shtetërore, makinerinë të implikuar etj. Natyrisht dhe për arsye objektive të vetë rolit të strukturave tona”, shprehet ai në emision
