Çështja e mbetjeve urbane, përpunimi, dhe depozitimi i tyre nga dikur një problematikë vetëm e pushtetit lokal, tashmë është kthyer në një debat të fortë politik në vend.
Kjo për shkak të projekteve miliona euro-she që qeveria “Rama” ka dhënë si për kompanitë e inceneratorëve, ashtu edhe për ndërtimin e landfilleve të mbetjeve.
Por ditët e fundit qeveria e ka ndryshuar sërish vendimin “Për landfillet e mbetjeve”, por jo duke u futur “këmbët në një këpucë” kompanive private, por përkundrazi.
Vendimi i ri i qeverisë “Rama” favorizon kompanitë aktuale që kanë në dorë zbatimin e projekteve shumë milionëshe, pasi ka shtyrë me anë të vendimit të ri, afatet për respektimin e kushteve mjedisore gjatë investimeve në lanfille.
Pikërisht vendimi i fundit, ka shtyhet me 4 vite afatin për zbatimin e planeve të miratuara nga Agjencia Kombëtare e Mjedisit, për kompanitë e depozitimit të mbetjeve.
Afati i planeve zbatuese për monitorimin e mbetjeve ishte parashikuar për të përfunduar në 31 dhjetor 2020. Me vendimin e ndryshuar, operatorët e depozitimit të mbetjeve, kanë afat të zbatojnë planet e përmirësimit, deri më 31 dhjetor 2024.
Vendimi sjell si “risi” edhe përgatitjen e një relacioni teknik shpjegues që Agjencia Kombëtare e Mjedisit, në varësi të Ministrisë së Mjedisit, duhet të përgatisë për rastet kur miraton planin e përmirësimit.
“Relacioni shpjegues përmban të dhëna mbi pikëzimin e venddepozitimit, si dhe ndikimin mjedisor, ekonomik e social të zonës ku ndodhet landfilli. Sekretariati shqyrton të gjithë dokumentacionin e përcjellë nga Agjencia Kombëtare e Mjedisit (AKM) dhe i përgatit një relacion përmbledhës Komitetit”,- thuhet në dokumentin e botuar në Fletoren Zyrtare.
Një tjetër pikë e re në vendim, është se në rast se operatorët e një vend-depozitimi ekzistues nuk kanë burimet financiare, ose aftësitë teknike për të përgatitur planin e përmirësimit të vend-depozitimit, me kërkesën e kompanisë, plani i përmirësimit të vend-depozitimit dhe rehabilitimi mund të kryhen nga ministria përgjegjëse për Mjedisin. Pra nga ministria e drejtuar nga Blendi Klosi.
Sakaq, për operatorët e një vend-depozitimi ekzistues, pavarësisht nëse ka ose jo leje mjedisi, do të kenë afat të përgatisin planin për përmirësimin e depozitimit deri më 31 dhjetor 2022, nga 31 dhjetori 2018, që ishte parashikuar në vendimin e mëparshëm.
Ndryshimet në Vendim:
Ishte
Operatori i një vend-depozitimi ekzistues, pavarësisht nëse ka ose jo leje mjedisi, deri në datën 31 Dhjetor 2018, përgatit një plan përmirësimi të vend-depozitimit dhe e paraqet atë për miratim në Agjencinë Kombëtare të Mjedisit.
Bëhet
Operatori i një vend-depozitimi ekzistues, pavarësisht nëse ka ose jo leje mjedisi, deri në datën 31 Dhjetor 2022, përgatit një plan përmirësimi të vend-depozitimit dhe e paraqet atë për miratim në Agjencinë Kombëtare të Mjedisit”.
Ishte
Agjencia Kombëtare e Mjedisit, pasi miraton planin e përmirësimit, e dërgon atë për shqyrtim në Komitetin Ndërministror për Mbetjet, i cili vendos për masat që duhen marrë dhe periudhën e nevojshme të tranzicionit për zbatimin e tyre, periudhë e cila në çdo rast përfundon në datën 31 Dhjetor 2020.
Bëhet
Agjencia Kombëtare e Mjedisit, pasi miraton planin e përmirësimit, e dërgon atë për shqyrtim pranë Komitetit Ndërministror për Mbetjet, i cili vendos për masat që duhen marrë dhe periudhën e nevojshme të tranzicionit për zbatimin e tyre, periudhë e cila në çdo rast përfundon në datën 31 dhjetor 2024.
Agjencia Kombëtare e Mjedisit, në rastet kur miraton planin e përmirësimit, përgatit një relacion shpjegues teknik për Sekretariatin Teknik të Komitetit, i cili dërgohet së bashku me planin e përmirësimit.
Relacioni shpjegues përmban të dhëna mbi pikëzimin e vend-depozitimit, si dhe impaktin mjedisor, ekonomik e social të zonës ku ndodhet landfilli.
Sekretariati shqyrton të gjithë dokumentacionin e përcjellë nga AKM-ja dhe i përgatit një relacion përmbledhës Komitetit.
/Burimi: Monitor.al/Përshtati: GazetaReforma.com/
