Gazetarja Klodiana Lala, e ftuar në emisionin “Të Paekspozuarit” në MCN TV, ka folur për kërkesën e babait të Ervis Martinajt që djali i tij të shpallet zyrtarisht i zhdukur. Ajo shpjegoi ecurinë ligjore të procedurës dhe zbuloi se një person i njohur nga bota e krimit ka tentuar të marrë statusin e të penduarit të drejtësisë, me pretendimin se kishte dijeni për fatin e Martinajt, por kërkesa e tij është refuzuar.
“Mustafa Martinaj ka kërkuar shpalljen si të zhdukur të djalit të tij, Ervis Martinaj. Xhaxhai i tij kishte shkuar në polici në vitin 2022, duke deklaruar se kishte humbur kontaktet me Ervisin. Që nga ai moment, për fatin e tij nuk dihet asgjë,” tha Lala.
Sipas saj, ligji parashikon që familjarët mund t’i kërkojnë gjykatës shpalljen e një personi si të zhdukur, nëse nuk kanë patur kontakt për dy vite. Kjo i jep familjes të drejtën të ketë akses mbi pasuritë dhe të drejtat pronësore të personit. “Në këtë rast, Mustafa Martinaj iu drejtua gjykatës pas tre vitesh. Me short është zgjedhur gjyqtari që po e shqyrton çështjen,” sqaroi gazetarja.
Ajo shtoi se gjykata shpall njoftime publike për gjashtë muaj, gjatë të cilëve çdo person që ka informacion për fatin e Martinajt mund të njoftojë gjykatën. Në mungesë të të dhënave, çështja kalon në një trup gjykues me tre gjyqtarë, të cilët u kërkojnë informacion institucioneve përkatëse. Nëse përgjigjet rezultojnë negative, personi shpallet zyrtarisht i zhdukur. Vetëm pas katër vitesh të tjera familja mund të kërkojë shpalljen si të vdekur, një procedurë që Lala e përshkroi si “më të koklavitur dhe të vështirë”.
Gazetarja nënvizoi se në rast se më vonë rezulton se personi jeton, lindin probleme ligjore, përfshirë edhe ndjekjen penale. “Mendoj se do të duhet më shumë kohë për të arritur në këtë pikë,” theksoi ajo.
Sipas Lalës, dosja për zhdukjen e Martinajt ndodhet në Prokurorinë e Lezhës nën drejtimin e Arben Nikës. Hetimet, sipas saj, nuk kanë avancuar shumë. “Janë marrë kamerat e sigurisë dhe janë pyetur personat që kishin dijeni. Është dënuar edhe polici që e shoqëronte, por dosja është në gjendje të fjetur. As nuk është mbyllur, as pezulluar. Prokuroria mund ta riaktivizojë nëse ka prova të reja,” u shpreh ajo.
Duke komentuar mungesën e çdo sinjali nga Martinaj për tre vite, Lala tha se kjo e bën të dyshojë se ai mund të jetë rrëmbyer dhe vrarë. “Rasti i tij është shumë kompleks, për shkak të pozitës që kishte në botën e krimit, përplasjeve me persona të fuqishëm dhe përballjeve me mazhorancën para zhdukjes. Ai ishte i përfshirë në lojërat e fatit dhe aktivitetet e tjera. Deri më tani nuk ka asnjë të dhënë tjetër,” tha ajo.
Në fund, gazetarja zbuloi se “një person i rëndësishëm i botës së krimit ka tentuar të marrë statusin e të penduarit të drejtësisë për të treguar fatin e Martinajt, por nuk i është dhënë ky status.”
“ Nuk di të them pse nuk iu dha,” përfundoi Lala.
