Një ngjarje e rëndë ka ndodhur në ishullin grek Mykonos, në aeroport, ku një shqiptar ka “lajthitur” dhe ka qëlluar me armë zjarri kunatin e tij.
Situata ka ndodhur pasditen e djeshme dhe shqiptari nuk është mjaftuar më një herë, por e ka qëlluar dy herë kunatin.
I plagosuri ka marrë plagë dhe është duke marre trajtim mjekësor në spital, ndërsa autori ka rënë në prangat e policisë Helene, sipas raportimit të Protothema.
Theksojmë se motivi i vrasjes së mbetur në tentativë ka të bëjë me mosmarrëveshjet personale mes dy familjeve. Mësohet se pasi qëlloi kunatin, autori tentoi të arratisej. Ishte vëllai i të plagosurit ai që e ndoqi nga pas, duke arritur të përleshen edhe bashkë.
Evidentojmë që problemet e shqiptarëve me ligjin në Greqi janë shpesh në kronikat kryesore. Por jo vetëm, historia e shqiptarëve në burgjet greke duket famëkeqe. Keqtrajtimet, diskriminimi dhe brutaliteti i gardianëve në vendin fqinj ka prodhuar histori të dhimbshme, ku të burgosurit shqiptarë kanë rënë pre e hakmarrjes dhe dhunës brenda institucioneve që ka ngritur shteti grek.
Burgu i Koridhalos është më famëkeqi në Greqi, por nuk mungojnë as rastet e fataliteteve në institucione të tjera. Disa vite më parë, Gjykata Evropiane e të Drejtave të Njeriut në Strasburg i tërhoqi vëmendjen për dhunën e ushtruar ndaj të burgosurve shqiptarë dhe atyre bullgarë në burgjet greke. Për këtë arsye, Greqia u gjobit me 110 mijë Euro për keqtrajtimet që u bëhen të dënuarve.
