Është shënuar viktima e 31-t nga koronavirusi në vendin tonë pasi Ministria e Shëndetësisë informon se një 71-vjeçar nga Shkodra ka ndërruar jetë në spitalin “Shefqet Ndroqi”.
Viktima ndodhej në gjendje të rëndë prej një muaji me insuficiencë respiratore akute, por ka mbyllur sytë mbrëmjen e sotme.
Sipas njoftimit të Ministrisë, bëhet me dije se i moshuari vuante edhe nga sëmundje shoqëruese, si diabeti, insuficienca kardiake, hipertensioni dhe anemia kronike.
“Një pacient 71-vjeçar, i konfirmuar me COVID19, në gjendje të rëndë prej 1 muaji, me insuficiencë respiratore akute, ka ndërruar jetë në spitalin “Shefqet Ndroqi” mbrëmjen e sotme. Pacienti 71-vjeçar me inicialet B.S., nga Shkodra, me pneumoni bilaterale, që vuante dhe nga sëmundje bashkëshoqëruese diabet, insuficiencë kardiake, hipertension, anemi kronike, megjithë asistencën e specializuar mjekësore në reanimacionin e spitalit “Shefqet Ndroqi”, nuk arriti të mbijetojë. Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerit dhe apelon qytetarët t’i respektojnë me shumë rigorozitet masat e distancimit fizik, pasi janë përcaktuese për frenimin e përhapjes së COVID-19. 31 qytetarë nuk e kanë fituar dot betejën me COVID19, pavarësisht përpjekjeve të stafeve mjekësore të spitaleve COVID.”
