651 mijë vaksina të reja Pfizer priten të vijnë së shpejti në rajon. Lajmi është bërë i ditur nga vetë kryeministri Edi Rama pasditen e sotme ndërmjet një postimi në rrjetet sociale.
Njoftimi për sigurimin e vaksinave u bë përmes një telefonate të kryeministrit Edi Rama me Presidenten e Komisionit Europian, Ursula von der Leyen, e cila njoftoi se BE do të shpërndajë 651 mijë vaksina për vendet e Rajonit.
“Një LAJM I MIRË në telefonatën me Presidenten e Komisionit Europian, Ursula von der Leyen: Së shpejti 651 mijë vaksina Pfizer do të vijnë në rajon nga Bashkimi Europian. Më në fund.”, shkruan kryeministri Rama.
Kujtojmë se veç Pfizer, në Shqipëri kanë ardhur dhe vaksinat ruse dhe kineze.
Sipas njoftimeve nga ministrja e Shëndetësisë dhe Mirqënies Sociale, Ogerta Manastirliu, nesër pritet të nisë vaksinimi masiv me vaksinën kineze, duke filluar me të moshuarit mbi 70 vjec. Ata janë lajmëruar nga qendrat shëndetësore sipas rendit alfabetik.
Në hapësirën e sheshit “Skënderbej” gjatë pasdites të kësaj të shtune do të nisin përgatitjen për ngritjen e disa tendave që do të shërbejnë si qendra vaksinimi.
Deri më tani kanë mbërritur 192 mijë doza të vaksinës Sinovac ndërsa pritet sipas objektivave të qeverisë që brenda muajit qershor të vaksinohen 1.2 milionë shqiptarë.
Por sipas të dhënave që prej fillimit të procesit të vaksinimit ka mbi 62 mijë shqiptarë të vaksinuar, ku përfshihen stafi mjekësor, mësues dhe të moshuar mbi 80 vjeç.
