Vaksina COVID-19 nga Pfizer Inc dhe BioNTech SE ishte në gjendje të neutralizonte një variant të ri të koronavirusit që përhapet me shpejtësi në Brazil, sipas një studimi laboratorik të botuar në Neë England Journal of Medicine këtë të hënë.
Gjaku i marrë nga njerëzit të cilëve u ishte bërë vaksina neutralizoi një version të inxhinierizuar të virusit që përmbante të njëjtat mutacione të mbartura në pjesën kulmore të variantit shumë ngjitës P.1 të identifikuar për herë të parë në Brazil. Studimi u krye nga shkencëtarë nga kompanitë dhe Dega Mjekësore e Universitetit të Teksasit.
Shkencëtarët thanë se aftësia neutralizuese ishte afërsisht ekuivalente me efektin e vaksinës në një version të mëparshëm më pak ngjitës të virusit nga viti i kaluar. Proteina e përdorur nga virusi për të hyrë në qelizat njerëzore është objektivi kryesor i shumë vaksinave COVID-19.
Në studimet e botuara më parë, Pfizer kishte gjetur se vaksina e saj neutralizonte variante të tjera më ngjitëse të identifikuara për herë të parë në Mbretërinë e Bashkuar dhe Afrikën e Jugut, megjithëse varianti i Afrikës së Jugut mund të zvogëlojë antitrupat mbrojtës të shkaktuara nga vaksina.
Pfizer ka thënë se beson se vaksina e saj aktuale ka shumë të ngjarë të mbrojë ende nga varianti i Afrikës së Jugut. Sidoqoftë, prodhuesi i ilaçeve po planifikon të provojë një dozë të tretë përforcuese të vaksinës së tyre, si dhe një version të rimodeluar posaçërisht për të luftuar variantin në mënyrë që të kuptojë më mirë përgjigjen imune.
/Reuters
