Është ndarë sot nga jeta në moshën 71-vjeçare një prej figurave më të mëdha të teatrit dhe kinematografisë shqiptare, aktori dhe regjisori Enver Petrovci. Lajmi i hidhur ka tronditur botën e artit, kulturës dhe publikun shqiptar, që e njohu e e duartrokiti për dekada me radhë në role të paharrueshme.
Enver Petrovci lindi më 28 shkurt 1954 në Prishtinë. Pas shkollimit fillestar, ai u regjistrua në Shkollën e Lartë Pedagogjike në degën e aktrimit, për t’i vijuar më pas studimet e larta universitare në Fakultetin e Arteve Dramatike të Universitetit të Beogradit. Ishte pikërisht aty ku talenti i tij nisi të marrë hov dhe ku u formua si një aktor i plotë, me një karrierë që shpejt do ta shndërronte në një emër të respektuar në mbarë hapësirën e ish-Jugosllavisë.
Petrovci u ngjit në skenat më të rëndësishme të teatrit, duke shkëlqyer në “Atelieja 212”, një nga teatrot më prestigjioze të kohës. Roli pas roli, ai fitoi duartrokitjet e publikut dhe kritikës, duke u cilësuar si një nga aktorët më të shquar dhe më të njohur të gjeneratës së tij. Publiku i gjerë e identifikoi jo vetëm si aktor të fuqishëm skenik, por edhe si një interpretues të aftë në kinematografi, ku luajti role që lanë gjurmë në filmin jugosllav, shqiptar dhe më vonë në atë ndërkombëtar.
Pas përfundimit të luftës në ish-Jugosllavi dhe ndryshimeve të mëdha politike në rajon, Petrovci u rikthye në Kosovë. Që prej vitit 1999 ai e zhvilloi aktivitetin e tij kryesisht në trojet shqiptare, duke kontribuar fuqishëm në ngritjen e artit dhe kulturës kosovare dhe shqiptare. Krahas angazhimit të tij si aktor dhe regjisor, ai dha një kontribut të jashtëzakonshëm si pedagog. Në vitin 1989 ishte ndër themeluesit e degës së Artit Dramatik pranë Fakultetit të Arteve të Universitetit të Prishtinës, ku nisi të ligjëronte lëndën e aktrimit. Breza të tërë aktorësh që sot mbajnë gjallë teatrin dhe filmin shqiptar janë rritur e formuar nga dora dhe përvoja e tij.
Petrovci ishte një artist i gjithanshëm: aktor, regjisor, pedagog dhe intelektual i përkushtuar ndaj artit. Ai njihej për interpretimin e tij të thellë, për qasjen serioze ndaj çdo roli, si dhe për guximin artistik që e bëri të veçantë në skenë. Suksesi i tij shtrihej nga rolet dramatike deri tek ato komike, nga skena e teatrit deri tek kamera e filmit.
Në kujtesën e publikut ai do të mbetet si një nga ikonat e artit shqiptar, një njeri që i kushtoi jetën kulturës dhe që la pas një trashëgimi të pasur artistike. Ndarja e tij nga jeta shënon humbjen e një figure të pazëvendësueshme për teatrin, kinematografinë dhe gjithë artin shqiptar.
Vepra dhe emri i Enver Petrovci do të mbeten përgjithmonë një gur themeli në historinë e kulturës sonë kombëtare.
