Kryeministri i vendit Edi Rama, u ndal ditën e sotme në një inspektim në zonat e goditura nga tërmeti, ku pa nga afër se si po ecën procesi i rindërtimit. Pas inspektimit në Fushë Krujë, kreu i qeverisë u ndal edhe në Thumanë për të cilën thotë se është vendi ku “gërmadhat e një tragjedie po ia lenë vendin një shembulli rrezatues të Rilindjes së Shpresës tek e Ardhmja”.
Së bashku me kryeministrin Edi Rama, ishte edhe ministri i Rindërtimit Arben Ahmetaj. Kryeministri u shprehë se pavarësisht zgjedhjeve dhe fushatës elektorale puna nuk është ndalur në këto zona.
“Po punë e madhe është bërë këto dy-tre javë ëë? Po paskan punu fort këto tre javë, ritmi s’paska rënë fare, këta e paskan dit që zgjedhjet do fitohen.
Bravo e keni qa, super.
Do bëhet Thumana model urban. Laçi nuk na ka votuar shumë por për ne s’ka rëndësi ne të vazhdojmë ti mbarojmë këto, për ne rëndësi ka që janë shqiptarë e të futën në shtëpi më të mira”, tha Rama duke bërë dhe ironi me rezultatin e zgjedhjeve në qarkun e Lezhës.
Sipas KQZ, në Njësinë Administrative të Laçit, PS ka marrë 3486 vota, ose 37.14 %, në krahasim me PD që ka siguruar më shumë vota, 4598, ose 48.99 % të votave.Kujtojmë që në Qarkun e Lezhës PD mori katër mandate deputetësh dhe PS mori tre mandate deputetësh.Sipas Ramës, në muajin shtator rindërtimi i Thumanës do jetë i përfunduar.
“Kjo në shtator janë të mbyllura. Kështu si po punoni duhet tju japi një skonto Zoti kur të shkoni edhe të jepni llogari ju të gjithë. Jo mo lerë atë skonton në 25 do ju japi një skonto se po pastroni një pjesë të shpirtit se ngelët duke fitu”, bëri batuta Rama gjatë inspektimit.
