Policia ka gjetur dy armët e përdorura në vrasjen e biznesmenëve në Laç, Bujar Lika, dhe Paulin Marku Gjergji. Raportohet se armët janë gjetur në afërsi të spitalit privat në Tiranë, ku po kurohej dhe një prej të dyshuarve kryesorë të ngjarjes Eduart Lamaj, i cili u vu në prangat e policisë disa ditë më parë, së bashku me dy mjekët që e operuan.
Armët dyshohet se janë fshehur nga Lamaj dhe pas sekuestrimit kanë kaluar në laboratorin shkencor për analizim të gjurmëve. Lamaj, i cili është arrestuar si autor i dyshuar për vrasjen e dy biznesmenëve Bujar Lika dhe Paulin Marku (Gjergji), në 30 Maj në Laç, ka deklaruar pak ditë më parë se një prej víktimave i kishte para borxh, dhe ai i kishte shkuar me qëllim për ti shkatërruar hotelin dhe jo për ta vrarë. Por sipas Policisë dhe prokurorisë ky version i Lamës nuk qendron.
“Më kishte borxh dhe shkova që ti shkatërroja hotelin, nuk kisha qëllim që ti vrisja. Ata më gjuajtën me armë dhe unë u kundërpërgjigja për vetëmbrojtje”, mësohet që të jetë shprehur Lamaj, që sipas Policisë nuk është e vërtetë pasi ka dyshime që të jenë pjesë e një grupi të strukturuar kriminal, dhe nuk përjashtohet mundësia që ata të jenë vrasës me pagesë.
Lamaj u vu në pranga teksa ishte duke u mjekuar në një klinikë private në Tiranë, për shkak se mbeti i plagosur në këmbë në ditën kur ndodhi atentati ndaj biznesmenëve. Bashkë me të u vunë në pranga dhe mjekët që e kanë ndihmuar.
Policia në njoftimin zyrtar tha se ka identifikuar dhe dy bashkëpunëtorët e tjerë që kanë ndihmuar Lamajn në vrasjen e Likës dhe Markut (Gjergjit).Ngjarja e rëndë është ende duke u hetuar dhe besohet se për arsye hetimore policia nuk ka publikuar ende emrat e porositësve të atentatit të bujshëm, për t’i shpallur në kërkim.
Nëse publikimi i identiteteve të porositësve nuk bëhet kurrë nga ana e policisë, kjo do të thotë se pala e tretë ka ditur shumë mirë se si t’u mbyllë gojën e për ta lënë ngjarjen në hije, ku për pak kohë do të harrohet nga drejtësia shqiptare.
