3 shqiptarë janë vënë në pranga nga policia në Milano, pasi është zbuluar një laborator për përpunimin e kokainës. Sipas mediave italiane në pranga kanë rënë 3 shqiptarë të moshave 29, 40 dhe 51, identitetet e të cilëve nuk bëhen me dije. Gjatë kontrollit në banesën që ishte përshtatur prej tyre janë gjetur edhe dy pistoleta gjysmë automatike, njëra e paligjshme me numrin serial të gërvishtur dhe tjetra e vjedhur.
Fillimisht më 15 korrik policia arrestoi 29-vjeçarin, i cili po lëvizte me makinë. Të riut iu gjetën 500 euro dhe dy telefona celular, njëri prej të cilëve me një sistem mesazhesh të koduara. Më pas kontrollet vazhduan edhe në apartament ku u gjetën dy shqiptarët e tjerë, 40 dhe 51 vjeç.
Në bodrum, policia gjeti një linjë prodhimi dhe përpunimi kokaine: midis banjës, dhomës nën shkallët dhe garazhit, u gjetën disa presa hidraulike dhe sende të tjera që shërbenin për përpunimin e kokainës.
Në strukturën e divanit të dhomës së ndenjes u gjetën dy pistoleta gjysmë automatike me karikatorë përkatës të pajisur me fishekë. Tre shqiptarët janë shoqëruar në burgun e Monzës dhe po kryhen veprimet e mëtejshme.
