Kryeprokurori i përgjithshëm Olsian Çela ka thënë se dita e sotme duhet të jetë një moment reflektimi për të vlerësuar nëse qytetarëve iu është ofruar një sitem drejtësie i besueshëm. Në përkujtimin e Ditës Kombëtare të Drejtësisë, Çela tha se prokurorët nuk duhet të tregohen të papërgjegjshëm me rritjen e pavarësisë së tyre. Ai gjithashtu tha se sfidta të përhershme duhet të jenë transparenca dhe dhënia e llogarisë. Ndër të tjera, kryeprokurori iu drejtua edhe magjistratëve që të bëhen pjesë e këtij procesi transformues.
“E nderuar ambasadore, zoti Metani, ministre Gjonaj, zonja Llagami. Dita e sotme duhet të jetë moment reflektimi për të vlerësuar ç’kemi bërë deri sot, nëse i kemi ofruar qytetarëve një sistem drejtësie të besueshëm.
Vizioni jonë institucional është shprehur në një strategji të qartë me organet ligjvënëse, sidomos një vëmendje e veçantë i është kushtuar institucioneve të reja të drejtësisë. Masat e marra ka bërë që të jenë në harmoni. S’mund të lihet asnjë çast që me pavarësinë e prokurorëve të rritet dhe papërgjegjësia e tyre. Mbetet thelbësor proceset e kontrollimit dhe disiplinës.
Transparenca dhe llogaridhënia janë sfida permanente. Mbetet thelbësor vështrimi kritik konstat. Kemi rrugë të gjatë për të mbërritur atje ku duam. I drejtohem magjistratëve që të bëhen pjesë e këtij procesi transformues. Gëzuar Ditën Kombëtarë të Drejtësisë, faleminderit”, tha Çela.
