Kuvendi i Kosovës vazhdon të mos konstituohet, edhe pas përpjekjes së 45-të, për shkak të mosmarrëveshjeve të thella mes partive politike.
Në seancën e mbajtur më 11 korrik morën pjesë 93 deputetë, por procesi dështoi sërish, pasi partitë nuk arritën një marrëveshje mbi procedurat e votimit për zgjedhjen e kryetarit të Kuvendit.
Tensionet kulmuan kur deputeti i PDK-së, Abelard Tahiri, akuzoi kryesuesin e seancës, Avni Dehari nga Lëvizja Vetëvendosje, për shkelje të Kushtetutës.
Debati i ashpër çoi në ndërprerjen e fjalës për disa përfaqësues të opozitës, pasi Dehari urdhëroi mbylljen e mikrofonëve.
Partitë opozitare PDK, LDK, AAK dhe Lista Serbe refuzojnë të propozojnë anëtarë për formimin e një komisioni për votim të fshehtë, duke e cilësuar këtë procedurë si jokushtetuese.
Ato kërkojnë respektimin e normave parlamentare dhe kritikojnë qasjen e Vetëvendosjes për të imponuar kandidaturën e Albulena Haxhiut për kryeparlamentare.
Haxhiu, e cila ka qenë e propozuar disa herë nga VV për postin e kryetares së Kuvendit, nuk ka arritur të marrë 61 votat e nevojshme në seancat e mëparshme me votim të hapur. Kjo ka nxitur pakënaqësi të thellë në radhët e opozitës, që e cilëson atë si një figurë përçarëse dhe jo konsensuale.
Ndërkohë, shoqëria civile ka reaguar me protesta të përsëritura përballë Kuvendit, duke kërkuar përgjegjësi nga deputetët. Aktivistët janë parë me pankarta ku shkruhej: “Demokracia nuk është veç procedurë”, “Cirku i Republikës së Kosovës”, “120 rroga, 0 përgjegjësi”.
Afati për konstituimin e Kuvendit, i përcaktuar nga Gjykata Kushtetuese, përfundon më 26 korrik. Megjithatë, gjykata nuk ka sqaruar se çfarë ndodh nëse Kuvendi nuk konstituohet brenda këtij afati.
Presidentja Vjosa Osmani është përfshirë në përpjekjet për të zhbllokuar situatën, përmes takimeve me përfaqësues të partive, por deri tani pa rezultat konkret.
Ajo ka paralajmëruar mundësinë që t’i drejtohet Gjykatës Kushtetuese për sqarime të mëtejshme lidhur me hapat e ardhshëm nëse ngërçi nuk zgjidhet.
