Deputetët e Kuvendit të Kosovës janë mbledhur sot për herë të 52-të në përpjekje për të përmbyllur procesin e konstituimit të Kuvendit, vetëm një ditë para përfundimit të afatit 30-ditor të vendosur nga Gjykata Kushtetuese.
Pas datës 26 korrik, sipas vendimit të Gjykatës, deputetët nuk do të kenë më të drejtë të ndërmarrin veprime për konstituimin e Kuvendit deri më 8 gusht, periudhë në të cilën është vendosur një masë e përkohshme ex officio.
Në arsyetimin e saj, Gjykata tha se çdo veprim i ndërmarrë pas skadimit të afatit rrezikon të shkaktojë pasoja të parikuperueshme për rendin kushtetues dhe funksionimin e institucioneve të Kosovës.
Ky vendim vjen ndërsa Kushtetuesja po shqyrton dy kërkesa të paraqitura nga Partia Demokratike e Kosovës dhe Lidhja Demokratike e Kosovës, që lidhen me procesin e konstituimit.
Lëvizja Vetëvendosje, si partia fituese e zgjedhjeve, ka të drejtën të propozojë kandidatin për kryetar të Kuvendit, por kandidatura e saj, Albulena Haxhiu, është refuzuar nga partitë opozitare, të cilat e shohin si figurë përçarëse. PDK, AAK, LDK dhe Lista Serbe kanë deklaruar se nuk e mbështesin asnjë kandidat të LVV-së dhe janë gjithashtu kundër ndryshimit të mënyrës së votimit nga e hapur në të fshehtë një çështje për të cilën Kushtetuesja dhe Vetëvendosje kanë interpretime të kundërta.
Në përpjekje për kompromis, javën e kaluar u zhvillua një takim mes kreut të Vetëvendosjes, Albin Kurti, dhe kryetarit të Nismës Socialdemokrate, Fatmir Limaj, partia e të cilit ka tre deputetë. Deri tani, nuk është njoftuar për ndonjë marrëveshje konkrete.
Në sfondin e krizës politike, presidentja Vjosa Osmani i është drejtuar Gjykatës Kushtetuese me kërkesa shtesë: të sqarojë pasojat ligjore nëse Kuvendi nuk konstituohet në afat dhe të vendosë një tjetër masë të përkohshme për zgjatjen e këtij afati. Ajo argumentoi se një ndërhyrje e tillë është e nevojshme për të shmangur një bllokadë institucionale.
Megjithatë, jo të gjithë e kanë përkrahur këtë qasje. PDK dhe AAK e kanë interpretuar si një përpjekje për të fituar kohë për LVV-në, ndërsa ish-kryetari i Gjykatës Kushtetuese, Enver Hasani, e ka quajtur kërkesën e Osmanit të pabazuar dhe të papranueshme.
Për të garantuar transparencën e procesit, Ambasada Gjermane njoftoi se ambasadori Jorn Rohde, së bashku me përfaqësues të tjerë diplomatikë, do të jenë të pranishëm në këtë seancë vendimtare.
Ndërkohë, presioni publik për përmbylljen e procesit mbetet i lartë. Organizatat e shoqërisë civile kanë kërkuar vazhdimisht që të konstituohen institucionet dhe të nisë puna e re legjislative. Deputetët duhet të zgjedhin jo vetëm kryeparlamentarin, por edhe pesë nënkryetarë, për të finalizuar formalisht konstituimin e Kuvendit.
