Ditën e sotme seanca plenare ka nisur me shumë rrëmujë të krijuar nga deputetët e grupit të ‘Rithemelimit’.
Fillimisht ata kanë përmbysur karriget dhe kanë bllokuar foltoren e Kuvendit.
Më pas ish-kryeministri Sali Berisha teksa ndodhej në ambientet e Kuvendit të Shqipërisë, ashtu sikurse e ka ‘zakon’ në situatat e tensionuara ka dhënë një prononcim në rrjetet sociale.
Ndër të tjera Berisha bëri të ditur se deputetët e opozitës do të shpallin grevën e urisë në salllën e Parlamentit.
Gjithashtu ai iu kërkoi kolegëve të mazhorancës të largohen nga salla e Kuvendit pasi nuk do të lejojnë që seanca plenare të zhvillohet normalisht.
“Tani mund të ikni se ne do vazhdojmë, do të shpallim grevën”, u shpreh Berisha.
Nga ana tjetër Garda e Republikës ka rrethuar godinën, ndërkohë që jashtë ambienteve të parlamentit ka një prezencë të shtuar të policisë në rast të përshkallëzimit të situatës. Në terren është parë dhe vetë Drejtori i Policisë së Tiranës, Tonin Vocaj, duke koordinuar punën e efektivëve.
Përveç numrit të lartë të gardistëve është vënë re dhe një prezencë e shtuar e efektivëve të Policisë së Shtetit.
