Gjykata Kushtetuese ka vendosur të shtyjë për më 23 prill seancën për shqyrtimin e një prej neneve të ligjit nr. 95 të vitit 2016, “Për organizimin dhe funksionimin e institucioneve për të luftuar korrupsionin dhe krimin e organizuar”, mbi të cilin funksionojnë Prokuroria e Posaçme dhe Gjykatat e Posaçme Antikorrupsion.
Gjyqtarët kushtetues kanë vlerësuar se, për këtë çështje, përveç Kuvendit dhe Këshillit të Ministrave, duhet të thirret edhe Këshilli i Lartë Gjyqësor si palë e tretë. Çështja ka të bëjë me një vendim të KLGJ për mos emërimin e gjyqtarit Gerd Hoxha në Gjykatën e Posaçme.
Hoxha ka paditur në Gjykatën Administrative, duke pretenduar se ishte skualifikuar nga gara për shkak të një vlerësimi negativ të dhënë nga komisioni i posaçëm pranë SPAK, që përbëhej nga dy prokurorë, një gjyqtar i posaçëm, një hetues financuar pranë SPAK dhe një hetues i BKH-së.
Hoxha ka argumentuar se komisioni përdori një foto të tij me Erion Veliajn, kryetarin e Bashkisë së Tiranës, në një aktivitet të organizuar nga ambasada britanike, si arsye për vlerësimin negativ.
Në këtë kontekst, Gjykata Administrative ka kërkuar një interpretim nga Gjykatën Kushtetuese për nenin që rregullon funksionimin e komisionit të posaçëm.
Çështja po shqyrtohet mbi bazë dokumentesh, dhe seanca e radhës është caktuar për 23 prill, kur Këshilli i Lartë Gjyqësor do të paraqesë pretendimet e tij si palë e tretë në proces.
