Gjykata Kushtetuese ka vendosur të rrëzojë vendimin e Qeverisë për shkarkimin e Erion Veliajt nga posti i kryetarit të Bashkisë së Tiranës, duke i dhënë atij të drejtën të vijojë detyrën edhe pse ndodhet në burg që prej muajit shkurt.
Vendimmarrja në trupën gjykuese ka qenë me shumicë votash, 5 pro dhe 3 kundër, në favor të rrëzimit të vendimit të Këshillit të Ministrave, i cili kishte miratuar propozimin e Këshillit Bashkiak të Tiranës për shkarkimin e Veliajt.
Me këtë vendim të Kushtetueses, anulohet automatikisht edhe dekreti i Presidentit Bajram Begaj për caktimin e datës së zgjedhjeve të reja në Tiranë.
Ndërkohë, Veliaj do të duhet të përballet me proceset hetimore të hapura nga SPAK për aferat dhe akuzat e ngritura ndaj tij gjatë viteve të drejtimit të Bashkisë së Tiranës, ku është cilësuar si një ndër kryebashkiakët më të akuzuar për korrupsion në historinë e kryeqytetit.
