Komisioni i Ligjeve do të nisë pas pak seancën dëgjimore me kandidatin për anëtar të Gjykatës Kushtetuese, Altin Binaj. Kjo vakancë është shpallur më datë 28 gusht 2020, rishpallur më datë 21 gusht 2019 dhe rishpallur më datë 24 shtator 2020, për shkak të mbarimit para kohe të mandatit të gjyqtarit Fatos Lulo. Miratimi i tij do t’i hapë rrugë funksionimit të Gjykatës Kushtetuese, që pritet të ndodhë para Vitit të Ri, një objektiv i vënë me këmbëngulje nga Ambasadorja Kim.
Vendimi Këshillit të Emërimeve në Drejtësi
Këshilli i Emërimeve në Drejtësi dërgoi vetëm një kandidaturë tjetër si vakancë të Kuvendit për anëtar të Gjykatës Kushtetuese.
Bëhet fjalë për Altin Binajn, i cili është miratuar në mbledhjen e fundit të KED, siç bën të ditur ky institucion. Ngushtimi i vetëm një kandidature duket se do të shkaktojë sërish polemika siç solli para pak ditësh ankimimi i Zhaklina Petos në gjykatën administrative dhe padinë në SPAK për kreun e KED, Vitore Tusha. Praktikat e mëparshme kanë treguar se KED i dërgon të paktën tre kandidatura sipas ligjit, për një vend vakant në Gjykatën Kushtetuese.
KED-së që i mbaron mandati në fund të vitit, pasi vijnë në detyrë anëtarët e rinj, bën të ditur se është në proces të pikëzimit të anëtarëve të KED-së. Altin Binaj është kandidat edhe për vakancën e shpallur nga presidenti, ndërkohë që për momentin është edhe Sonila Bejtja. Kuvendi nëse e miraton Binajn si anëtar Gjykate atëherë edhe në presidencë mund të shkohet vetëm një emër për anëtarin e Gjykatës Kushtetuese.
Sipas ligjit për Gjykatën Kushtetues, për një vend vakant duhen tre kandidatë, kusht që nuk është respektuar në rastin konkret për shkak të rrethanave, emergjencës dhe mungesës së kandidatëve që plotësojnë kushtet.
Ultimatum nga SHBA dhe i BE
Emri i Binajt do të votohet në Kuvend ditën e enjte që do të jetë dhe seanca e fundit parlamentare për këtë vit. Pas këtij vendimi ka ardhur dhe reagimi i ambasadores Yuri Kim ku përmes një postimi në Twitter ajo shkruan se tashmë sapo Presidenca të emërojë gjyqtarin e saj, Gjykata Kushtetuese do jetë funksionale.
Ky vendim i KED për të miratuar listën finale vjen pas ultimatumit të dhënë nga ambasadorët, konkretisht nga ambasadorja e SHBA në Tiranë Yuri Kim e cila ka përsëritur thirrjet për të bërë funksionale brenda këtij viti Gjykatën Kushtetuese, ndërsa ka theksuar se nuk duhet të pritet derisa BE të marrë një vendim.
Pas ambasadores Yuri Kim, edhe ai i BE-së, Luigi Soreca ka përshëndetur progresin e bërë për ndërtimin e Gjykatës Kushtetuese.
“Ne e mirëpresim vendimin e sotëm nga KED për dërgimin e emrit kandidat për Gjykatën Kushtetuese që të miratohet nga Parlamenti. Tani është e rëndësishme të vazhdojmë në të njëjtën frymë dhe të përfundojmë listat për anëtarët e tjerë që do të emërohen nga Presidenti” – shkruan Soreca.
Sa anëtar duhen, që gjykata të jetë funksionale
Gjykatës Kushtetuese të Shqipërisë i duhet edhe një anëtar për të marrë vendime. Aktualisht Gjykata Kushtetuese ka katër anëtarë; Vitore Tusha, Elsa Toska, Marsida Xhaferllari dhe Fiona Papajorgji, nga 9 në total. Që Gjykata Kushtetuese të shqyrtojë çështje në seancë plenare dhe të marrë vendime, duhet të ketë 6 anëtarë. Duke e konsideruar Binajn të miratuar, duhet edhe një anëtar të Kushtetuesja të funksionojë.
/GazetaReforma.com/
