Ditën e sotme filloi sesioni i 10 parlamentar, i cili s’ka nisur aspak në mënyrë të qetë. Si u paralajmërua seanca do të jetë e ndarë në dy orare, pjesa e parë u mbajt në orën 10:00 ku filloi punën Parlamenti dhe u ngrit një komision i posaçëm, për verifikimin e mandateve. Ndërsa në orën 17:00 do të bëhet betimi i deputetëve që kanë dalë fitues në zgjedhjet e 25 prillit.
Kujtojmë se në institucuinin e dytë më të rëndësishëm shtetëror në vend nuk do të ulen 140 deputetë, pasi në seancën plenare sot do të ketë 4 karrige bosh, 1 nga opozita dhe 3 nga mazhoranca.
Por duket se kjo çështje është zgjidhur, pasi katër deputetët që dhanë dorëheqjen do të zëvendësohen. Gjithashtu Komisioni Qendror i Zgjedhjeve ka bërë të ditur se në orën 13:00 do të zhvillojë një mbledhje për të zëvendësuar deputetët e larguar
Mimi Kodheli do të zëvendësojë Najada Çomon në listën e PS në Tiranë.
Denis Deliu do të zëvendësojë Lefter Kokën në listën e PS në Durrës.
Mirela Pitushi do të zëvendësojë Gramoz Ruçin në listën e PS në Fier.
Ndërsa Elda Hoti do të zëvendësojë Mark Markun në listën e PD-së në Lezhë.
Sjellim edhe një herë në vëmendje se mbrëmjen e djeshme, Lulzim Basha largoi nga grupi parlamentar i PD-së, Sali Berishën, kjo solli edhe pakënaqësi te simpatizantët e tij të cilët e kanë pritur me sharje, fyerje dhe ofendime jashtë dyerve të selisë blu.
