Gazetari Klodian Tomorri, i ftuar në emisionin Task Force në SYRI TV, ka ngritur pikëpyetje të forta mbi udhëtimin me avion charter të kryeministrit Edi Rama drejt Izraelit, duke theksuar se mungesa e transparencës për financimin e këtij udhëtimi përbën indicie për vepër penale dhe duhet të çojë në nisjen e hetimeve nga prokuroria.
Sipas Tomorrit, qeveria i mban sistematikisht sekret udhëtimet e kryeministrit, ndërsa Agjencia për Media dhe Informim mjaftohet me deklaratën standarde se udhëtimet “nuk janë paguar me taksat e shqiptarëve”, pa sqaruar se kush është financuesi real. Ai e cilësoi këtë situatë si financim sekret, i papranueshëm për një zyrtar të lartë publik.
“Pse është vepër penale? Sepse nuk mund të funksionojë një qeveri apo një zyrtar publik që merr financime sekrete. Ata thonë se nuk e ka paguar qeveria, por nuk tregojnë se kush e ka paguar. Praktikisht jemi përballë një financimi të fshehtë”, u shpreh Tomorri.
Gazetari theksoi se kjo nuk është hera e parë që ndodh një situatë e tillë, duke kujtuar raste të mëparshme kur udhëtimet janë justifikuar me argumente të paqarta, përfshirë përdorimin e avionëve të vënë në dispozicion nga kompani private. Sipas tij, problemi nuk qëndron tek fakti nëse kryeministri udhëton me avion privat apo jo, por tek burimi i parave që mbulojnë këto shpenzime.
“Dinjiteti nuk është të udhëtosh me avion privat, por të mos vjedhësh. Thelbi është që ti nuk mund të thuash se nuk e ka paguar buxheti, por e ka paguar një financues privat i panjohur. Kush është ky?”, tha Tomorri.
Ai paralajmëroi se një financues sekret mund të jetë kushdo, përfshirë persona apo struktura të papërshtatshme, dhe se ekziston rreziku i konfliktit të interesit nëse financuesi përfiton më pas favore apo asete publike nga vendimmarrja e kryeministrit. Tomorri solli si shembull edhe një rast të mëparshëm, kur një fluturim privat për një aktivitet zyrtar kishte kushtuar rreth 45 mijë euro për një udhëtim të vetëm, duke ngritur sërish pyetjen se kush i mbulon realisht këto kosto.
Në përfundim, ai theksoi se transparenca minimale e ofruar nga institucionet, duke deklaruar vetëm se paratë nuk vijnë nga taksapaguesit, nuk mjafton. “Kjo është indicie për të hapur hetime. Kryeministri nuk mund të marrë para nga njerëz të panjohur”, përfundoi Tomorri.
