Rania Zeriri, një këngëtare holandeze e njohur në botën e muzikës pop, është gjetur në një situatë të vështirë në Mercogliano, një qytet në rajonin e Avelinos në Itali, ku jeton si e pastrehë.
Pas vdekjes së nënës së saj, 39-vjeçarja u gjet e ulur në anë të rrugës me disa çanta, dhe kjo ka bërë që administrata lokale të ndërhyjë për ta ndihmuar.
Kryetari i bashkisë së Mercogliano, Vittorio D’Alessio, ka postuar një foto të Ranias dhe ka theksuar se ata po bëjnë çmos për ta mbështetur.
Ai është në kontakt me ambasadën holandeze dhe po punon për të siguruar ndihmën e nevojshme për këngëtaren. Po ashtu, psikologja Michela Bortugno ka filluar të ofrojë mbështetje për Zeririn, ndërsa një ambient strehimi është siguruar për të.
Miqtë e Ranias në Holandë dhe deputeti italian, Francesco Emilio Borrelli, gjithashtu kanë filluar të organizojnë thirrje për ndihmë, duke ofruar mbështetje për rikthimin e kontaktit me familjen e saj.
Zeriri kishte pasur një karrierë të suksesshme si këngëtare, duke marrë pjesë në spektaklin e njohur gjerman “Deutschland sucht den Superstar” dhe duke fituar famë në Holandë dhe Gjermani.
Kjo ngjarje ka ngjallur kujtime të ngjashme me rastin e këngëtares shqiptare Parashqevi Simaku, e cila gjithashtu ka kaluar një periudhë të vështirë, por tani është përkujdesur dhe shëruar.
