Ditën e sotme, Policia e Shtetit njoftoi se Ariol Halilaj, 29 vjeç, nga Skrapari është vënë në pranga pasi akuzohet se është një nga bashkëpunëtorët kryesorë në atentatin ndaj prokurorit Arjan Ndoja, ku mbetën të plagosur Ndoj dhe Aleksandër Laho, i njohur ndryshe si Rrumi i Shijakut, dhe humbi jetën shoferi i prokurorit, Andi Maloku.
Sipas njoftimit zyrtar, mësohet se Halilaj, është personi që ka ndihmuar autorët e krimit të largoheshin nga vendi ku u krye atentati, bashkë me mjetin e tyre.
LEXO: Atentati ndaj prokurorit Arjan Ndoja, në pranga një tjetër person! Ndihmoi autorët të largoheshin
Së fundmi, Dosja.al ka zbardhur detaje të tjera në lidhje me Ariol Halilajn, i cili ka qenë i punësuar pranë Inspektoriatit të Pyjeve në Tiranë, një detaj ky që e lidh me Santiago Malkon, për nga profesioni, ish-të punësuarin si inspektor që u ekzekutua mbrëmjen e 27 gushtit të vitit 2019, në rrugën “Xhanfize Keko” në Tiranë.
Emri i Halilajt ka dalë nga telefoni që iu sekuestrua Redjan Rrajës, i cili është në burg për të njëjtën ngjarje, megjithatë thelbësore kanë qenë edhe shenjat e gishtave të Halilajt, që janë gjetur në mjetin që u përdor në krim.
Sipas hetuesve, Ariol Halilaj ka strehuar në shtëpi Rrajën pas krimit, por ky i fundit u prangos teksa po tentonte të kalonte kufirin e Shqipërisë.
Për Halilajn, Gjykata e Posaçme e Shkallës së Parë për Korrupsionin dhe Krimin e Organizuar, ka caktuar masën e sigurisë “Arrest në burg”, për veprën penale “Përkrahja e autorit të krimit e kryer në rrethana cilësuese”.
