Kuvendi do t’i hapë sot rrugë funksionimit të Gjykatës Kushtetuese, nëse do të votojë pro zgjedhjes së kandidatit për anëtar Altin Binaj. Mësohet se Komisioni për Çështjet Ligjore, Administratën Publike dhe të Drejtat e Njeriut, i ka dhënë dritë jeshile dhe pritet që relatori Adnor Shameti t’u propozojë kolegëve të miratojnë këtë kandidaturë.
Kandidatura e Binajt ka marrë më parë aprovimin e Këshillit të Emërimeve në Drejtësi. Tashmë në duart e deputetëve është lista përfundimtare e renditjes së kandidatëve për gjyqtar në Gjykatën Kushtetuese, e miratuar nga KED, për vendin vakant,vakancë e parakohshme, e shpallur nga Kuvendi në datën 28 gusht 2018, rishpallur në datë 21gusht 2019 dhe rishpallur në datë 24 shtator 2020.
Rishpallja e hapjes së procedurës për kandidim më datë 24 shtator 2020, u bë për vendin vakant në Gjykatën Kushtetuese, të ish-anëtarit të gjykatës kushtetuese Fatos Lulo. Kandidatët që aplikuan ishin 1. Zoti Altin Binaj. 2. Zonja Ardita Buna (Alsula). 3. Zoti Ilir Haznedari.
KED kreu verifikimin e kushteve ligjore dhe vlerësimin e kritereve profesionale e morale të kandidatëve për anëtarë të Gjykatës Kushtetuese, shqyrtoi dhe rendi kandidatët sipas meritës profesionale.
Më datë 26.11.2020, KED vendosi ndalimin e kandidimit për kandidatët Ilir Haznedari dhe Ardita Buna (Alsula) dhe lejimin e kandidimit për kandidatin Altin Binaj.
Sipas jetëshkrimit Altin Binaj ka ndjekur 26 veprimtari trajnimi afatshkurtra në pjesën dërmuese të tyre në Shkollën e Magjistraturës Tiranë si dhe në Poloni, Rumani, SH.B.A, Itali, Spanjë, Moskë, Kosovë, Belgjikë, dhe Kroaci. Binaj ka qenë hetues, për periudhën 1992 – 1997, në Prokurorinë e Rrethit Vlorë, Prokuror, për periudhën 1997-2008”, në Prokurorinë e Rrethit Gjyqësor Vlorë, Prokuror dhe drejtues, për periudhën 2008 –2010, në Prokurorinë e Rrethit Gjyqësor Fier. Prokuror dhe drejtues, për periudhën 2010 – 2013”, në Prokurorinë e Rrethit Gjyqësor Durrës. Prokuror, për periudhën 2013 – 2016”, në Prokurorinë e Përgjithshme Tiranë. Prokuror dhe drejtues, për periudhën 2016 e në vijim, në Prokurorinë e Apelit Vlorë.
Në momentin e vlerësimit, ky kandidat ka gjithsej 28 vjet e 4 muaj e 9 ditë vjetërsi në profesion, duke plotësuar kriterin e vlerësimit “vjetërsia në profesion”.
Binaj ka kaluar me sukses vetingun dhe verifikimit të pasurisë personale dhe të familjarëve. Rezulton se kandidati ka përfunduar studimet universitare me notë mesatare 8.2, po ashtu kandidati ka ndjekur rregullisht trajtimet vazhduese në Shkollën e Magjistaturës.
Sipas ligjit Kuvendi duhet të kishte tre kandidatura dhe të zgjidhte një prej tyre, por procedura e përshpejtuar po ndiqet për arsye se Gjykata Kushtetuese prej një kohe të gjatë është jo funksionale. Plotësimi i 6 anëtarëve do të bënte të mundur që ajo të marrë vendim në seancë gjyqësore.
/Gazetareforma.com/
