Kryeministri në detyrë i Kosovës, Albin Kurti, ka folur sot për marrëdhënien me kryeministrin Edi Rama, për të cilin u shpreh se nuk ka shumë komunikime.
Në një intervistë për Rtv Ora, Kurti solli edhe njëherë në vëmendje refuzimin e kryeministrit shqiptar për ta takuar në mars për një plan të përbashkët veprimi kundër koronavirusit.
Ai tregoi se ka bërë të gjitha përpjekjet për një marrëdhënie normale, duke shtuar kryeministrat e dy shteteve shqiptare nuk e kanë luksin të injorojnë njëri-tjetrin në këtë mënyrë.
“Nuk kam shumë raporte me kryeministrin Rama për shkak se unë propozova të takohemi bashkë tre liderë institucionalë nga Kosova dhe Shqipëria në fund të muajit mars. Meqenëse nuk mund të bëjmë takimet e qeverive, thashë ta bëjmë krerët institucionalë, krerët e Kuvendit, Kryeministrat dhe Presidentët nga Kosova dhe Shqipëria. 6 veta të diskutojmë dhe për çështjen e luftimit të pandemisë Covid-19 por edhe për hallet e njëri-tjetrit dhe hallet e përbashkëta sepse kufiri nuk duhet të na ndante. Kosova dhe Shqipëria e kanë një kufi që nuk është i shqiptarëve dhe ne përfaqësojmë shqiptarët por nuk pati gatishmëri dhe interesim për një takim të tillë. Unë jam i interesuar që të bashkëpunojmë, mendoj se kryeministri i Kosovës dhe ai i Shqipërisë nuk e ka kanë komoditetin dhe as lirinë që ta injorojnë njëri-tjetrin kështu dhe që të mos takohen, të mos komunikojnë dhe të bashkëpunojnë”, u shpreh Kurti.
Më herët ditën e sotme mediat në Kosovë kanë zbuluar axhendën e konsultimeve të kryeministrit në detyrë Albin Kurti i cili gjatë pandemisë ka zhvilluar disa telefonata me homologët.
Sipas tyre, Kurti ka biseduar në telefon dhe është konsultuar me të gjithë liderët e Ballkanit Perëndimor, vetëm me Edi Ramën jo.
Madje, ai ka komunikuar edhe me ish- kryeministrin maqedonas Zoran Zaev dhe presidentin Ilir Meta.
