Kryeministri i Kosovës, Albin Kurti ka marrë ditën e sotme pjesë në Samitin për Ballkanin Perëndimor të zhvilluar në Tiranë. Albin Kurti ka pranuar se mes tij dhe kryeministres serbe, Ana Brnabiç ka pasur përplasje. Ai në një deklaratë për mediat u shpreh se pikërisht për çështjen e njohjes, pati polemika me kryeministren serbe. Kurti ka thënë se kryeministrja serbe nuk donte të pranonte që Kosova është shtet i pavarur. Ndër të tjera Kurti ka shtuar se Kosova ka 13 vite që e ka shpallur pavarësinë nga Serbia dhe ka vazhduar më tej duke thënë se është koha e fundit që Serbia të shpallë pavarësinë nga Kosova.
Ai ritheksoi edhe një herë nevojën për njohjen e pavarësisë së Kosovës nga ana e Serbisë, në kushtet kur të dy shtetet marrin pjesë në këtë nismë.
“Nuk dëshironte të pranonte që Kosova është shtet i pavarur dhe sovran. Unë theksova që Serbia do të duhej të shkëputej duke u distancuar nga regjimi i Millosheviqit dhe trashëgimia e tij. Njohja e pavarësisë së Kosovës është e vlefshme edhe për vetë Serbinë, që në këtë mënyrë mban veten peng. Kosova e ka shpallur prej 13 vitesh pavarësinë nga Serbia, është koha e fundit që Serbia të shpallë pavarësinë nga Kosova”, tha Kurti.
