Situata e tensionuar në veri të Kosvës ka bërë që përfaqësuesi i Lartë i BE-së Josep Borrell të ftonte në një tryezë të përbashkët të dy liderët përkatës të vendeve, Kurtin dhe Vuçiç në Bruksel.
Ndërkohë që tashmë bëhet me dije se ftesa është pranuar dhe kryeministri i Kosovës, Albin Kurti, dhe presidenti i Serbisë, Aleksandar Vuçiç, më 18 gusht do të zhvillojnë rundin e ri të bisedimeve.
Këtë e konfirmoi për mediat zëdhënësi i bllokut, Peter Stano, i cili shtoi se se më vonë do të japin detaje të tjera për agjendën e takimit të 18 gushtit.
“Mund të konfirmoj se pasi përfaqësuesi i Lartë, Josep Borrell, ftoi të dy palët në Bruksel, kryeministri Kurti dhe presidenti Vuçiç kanë pranuar ftesën e tij. Ata do të mirëpriten në Bruksel më 18 gusht nga Borrell dhe përfaqësuesi i posaçëm i BE-së, Mirosllav Lajçak, për të diskutuar për rrugën përpara në dialogun Prishtinë-Beograd”, tha Stano.
Kujtojmë që barrikadat u hoqën pasditen e 1 gushtit dhe Qeveria e Kosovës u zotua se do të shtyjë për një muaj zbatimin e këtyre dy vendimeve. Në ftesën e Borrellit u tha se në takim do të bisedohej për të gjitha çështjet e hapura mes dy shteteve.
Vlen të theksojmë se takimi i 18 gushtit do të jetë i treti midis Kurtit dhe Vuçiçit. Ata në kuadër të dialogut janë takuar dy herë gjatë vitit të kaluar, por dy takimet nuk kanë prodhuar ndonjë rezultat konkret.
