Kryeministri i Kosovës, Albin Kurti ka uruar besimtarët myslimanë për festën e shenjtë të Fitër Bajramit. Në një postim në facebook, Kurti shkruan se në këtë ditë duhet shumëfishuar lumturia duke e ndarë me njëri-tjetrin.
“Me fat Fitër Bajrami!
Në mesin e begative të festës së Bajramit le t’i kujtojmë kufizimet e përjetuara gjatë Ramazanit, ashtu që reflektimet nga ky muaj të na shoqërojnë përgjatë gjithë vitit.
Në këtë ditë feste, le të shumëfishojmë lumturinë duke e ndarë me të tjerët, duke uruar më të mirat për njëri-tjetrin dhe duke u kujdesur për shëndetin e njëri-tjetrit.
Mbarësia e kësaj dite le të vulos besimin se çdoherë mund të japim më shumë, më shumë sesa që marrim.
Qofshin zemrat tuaja gjithmonë burim shprese! Qoftë kjo festë gëzim për të gjithë!”, shkruan Kurti.
Po ashtu, një urim për besimtarët ka ardhur edhe nga kreu i Lidhjes Demokratike të Kosovës, Lumir Abdixhiku. Ai shkruan se në këto kohë të vështira pandemie, duhet shtuar kujdesi për njëri-tjetrin e të tejkalohet më lehtë kjo sfidë.
“Të gjithë besimtarëve islam, me fat Fitër Bajrami!
Me shpresën që agjerimi e lutjet tuaja të jenë pranuar, uroj që kjo festë, në gjithë mirësinë e mbarësinë e saj, të sjellë shëndet e begati në shtëpitë e familjet tuaja.
Festa e Bajramit kulmon pas një muaji të shenjtë sakrifice. Tek ky muaj besimtarët synojnë gjetjen e mirëkuptimit dhe ndjenjës së dhembshurisë e të bamirësisë për ata që kanë nevojë për ndihmë dhe solidaritet; për vepra të mira e për afrim me njëri-tjetrin.
Këtë afrim e gjejmë në këtë festë. Këtë mësim e shpërndajmë mes nesh; tek të afërmit e të huajt pa dallim, por mbi të gjitha, tek nevojtarët e shumtë në këtë vend.
Në këto kohëra të vështira pandemie, ta shtojmë kujdesin dhe lutjet për njëri tjetrin, e ta tejkalojmë këtë sfidë sa më lehtë e sa më parë.
Zoti i bekoftë shtëpitë e familjet tuaja.
Zoti e bekoftë Kosovën”, shkruan Abdixhiku në urimin e tij.
