Richard Grenell, i dërguari i posaçëm i Donald Trump, prej muajsh gjendet në Ballkan për të arritur një marrëveshje mes Kosovës e Serbisë, por deri tani ka shkaktuar një krizë të thellë politike në shtetin e Kosovës.
Diplomati amerikan nuk ka patur një raport të mirë me kryeministrin Kurti, sepse ky i fundit e ka kundërshtuar duke kërkuar reciprocitet dhe duke këmbëngulur se nuk do ta heqë taksën, në qoftë se Serbia nuk e njeh Pavarësinë e Kosovës.
Mirëpo, duket se Grenell nuk i pëlqen shumë që ta kundërshtojnë, pasi kërkesës së Kurtit i është përgjegjur me presione e kërcënime që nisën nga anulimi i investimeve amerikane dhe përfunduan te tërheqja e trupave ushtarake nga Kosova.
Tashmë, dy ditë pasi Kuvendi i Kosovës ka votuar shkarkimin e ‘qeverisë Kurti’, duket se Grenellit nuk ka ndërmend t’i ndahet Kurtit.
Për herë të parë ai ka dhënë një intervistë për ‘Pressing’, ku ka treguar më shumë rreth raportit të tij me numrin 1 të Vetëvendosjes.
Sipas tij, gjatë bisedave që ka patur me Kurtin, ky i fundit ia ka thënë qartazi se nuk do ta heqë taksën, por vijoi më tej duke thënë se ajo është e dëmshme për ekonominë dhe popullin e Kosovës.
“Ai më pa në sy dhe tha se ata do ta heqë taksën. Por, taksa 100 për qind që është zbatuar para Kurti ka qenë duke dëmtuar ekonominë dhe popullin e Kosovës shumë”.
Më pas, amerikani tregoi se nuk ka folur me Thaçin e Vuçiç rreth shkëmbimit të territoreve si një zgjidhje ndërmjet Kosovës e Serbisë dhe tha se për të nuk është një opsion i mirë dhe nuk e ka mbështetur asnjëherë.
“Kurrë. Kurrë nuk është ngritur si çështje në praninë time dhe siç thashë, kjo nuk është diçka që e kam parë ose që është folur për të dhe meqë ra fjala, më lejoni të jem shumë i qartë. E kam thënë këtë më parë. E kemi thënë këtë në Tëitter, kemi lëshuar deklarata për medie, kur ato kanë kërkuar. Kjo nuk është hera e parë që kemi qenë të qartë se këto thashetheme janë thjesht kaq, janë thashetheme. Unë personalisht jo. Unë nuk e shoh këtë si opsion.”, u shpreh Grenell.
Duke folur rreth raporteve me qeverinë e re që pritet të krijohet në Kosovë pas mocionit të mosbesimit ka insistuar që qeveria e re duhet ta heq taksën.
“Shikoni, ne nuk do të përfshihemi në politikë. Populli i Kosovës do ta zgjedhë qeverinë e vet, ata do ta zgjedhin udhëheqësin e vet, por Shtetet e Bashkuara do t’i zgjedhin politikat e veta dhe politika jonë është shumë e qëndrueshme, pavarësisht kush është në detyrë. Taksa duhet të hiqet, sepse ne besojmë se taksa 100 për qind që e ka Kosova është duke e dëmtuar ekonominë tuaj.” ka nënvizuar ai.
Më tej ka thënë se SHBA po përpiqet të ndihmojë Kosovën, Serbinë, të gjithë rajonin, për të krijuar një zonë apo rajon që ka vende pune dhe shpresë për të rinjtë në mënyrë që ata të qëndrojnë në rajon dhe të kenë vende pune cilësore.
