Në New York, mjekët po kurojnë pacientët e prekur nga koronavirusi, me doza të larta të vitaminës C, pas rezultateve pozitive që kjo metodë ka dhënë në Kinë.
Eksperti për sëmundjet pulmonare në Long Island, Andrew Weber, ka thënë për “New York Post”, se u ka dhënë pacientëve që ndodhen në terapi intensive, 1500 mg vitaminë C, në mënyrë intravenoze.
Kjo dozë u jepet 3-4 herë në ditë pacientëve dhe është 16 herë më e lartë se norma e përcaktuar nga Instituti Kombëtar i Shëndetit në SHBA.
“Pacientët që morën vitaminë C reaguan shumë më mirë se ata që nuk morën vitaminë C. Ndihmon shumë, por nuk është theksuar pasi nuk është një medikament i rëndësishëm”, shprehet mjeku.
Ai shpjegon se trajtimi me vitamin C, është bërë paralelisht me trajtimin me hydrochloroquine (anti-malarial) dhe azithromycin (antibiotik), si dhe hollues gjaku.
“Tek pacientët në gjendje të rëndë, tek të cilët trupi mbivepron në tentativë për të luftuar infeksionin, ka rënie drastike të vitaminës C. Prandaj ka kuptim tentativa për të mbajtur nivele të tilla të vitaminës C”, shprehet Weber.
Kjo metodë u aprovua në SHBA, vetëm pak ditë pas thirrjeve të presidentit, Donald Trump për përdorimin e tyre, duke qenë se sipas një studimi francez, kombinimi i këtyre medikameneve, kishte dhënë efekt tek pacientët me COVID-19.
Në Shqipëri ende nuk ka një informacion zyrtar në lidhje me protokollin e ndjekur për trajtimin e pacientëve.
Mjeku Tritan Kalo në një postim në Facebook tregoi se medikamentet që përdoren janë Actemra (ilaç kundër artritit) Aluvia (ilaç kundër HIV) dhe Tamiflu (antiviral që ka rezultuar jo efektiv)
Ndërsa zv. Ministrja e Shëndetësisë, Mira Rakacolli, ku është pyetur nga gazetarët në lidhje me këtë çështje, është shprehur se pacientët po kurohen me ilaçet kundër malaries, që po përdoren edhe në vendet e tjera.
