Ka ndërruar jetë në moshën 87-vjeçare, ikona e televizionit, Larry King.
Ndër dekada, prezantuesi me famë botërore do të arrinte majat e suksesit përmes intervistave të tij të bujshme.
Disa javë pasi u shtrua në spital, i infektuar me COVID-19, King humbi jetën në një qendër mjekësore në Los Angeles. Ai rezultoi i prekur nga virusi dhjetorin e shkuar.
Ylli i CNN-it pati përgjatë viteve të fundit probleme me zemrën, pa lënë pas kancerin në mushkëri dhe diabetin.
Por përpos famës dhe simpatisë së publikut, jeta nuk u tregua fort bujare me të. Vitin e shkuar, King humbi dy nga pesë fëmijët e tij, brenda disa javësh.
Ndër të tjera, King ishte edhe autori dhe moderatori i programit “Larry King Live” në CNN, për plot 25 vjet, ku intervistoi kandidatë presidencialë, yje kinematografikë dhe njerëz të zakonshëm.
Larry King përfaqësoi gjithashtu një figurë tepër aktive sa i takon publicistikës. I ndjeri qe gjithashtu moderator i Forumit të gjashtë Euroaziatik Kazenergy në Astana, Kazakistan, një forum vjetor për sektorin e energjisë së Kazakistanit që ndodhi në tetor të vitit 2011.
King organizoi serialin arsimor televiziv “In View with Larry King” nga 2013-a në 2015-ën, i cili u transmetua në rrjetet televizive kabllore përfshirë “ Fox” dhe “Discovery”.
