Një grup të rinjsh nga Lezha kanë organizuar sot një protestë para Gjykatës Kushtetuese, për të kundërshtuar marrëveshjen për emigrantët mes Ramës dhe Melonit. Kësaj proteste iu kanë bashkuar edhe qytetarë nga Tirana, që mbanin në duar pankarta, ku në to shkruhej: “Shqipëria nuk është pronë private e Edi Ramës.”
Edhe më parë të rinjtë nga Lezha kanë kundërshtuar ngritjen e kampeve të refugjatëve në Gjadër dhe Shëngjin.
Në protestën e sotme ata janë shprehur se vendi ynë nuk mund t’ua garantojë të drejtat emigrantëve siç mund t’ua garantojë Bashkimi Europian.
“Thjesht nuk mund t’ua garantojnë të drejtat emigrantëve siç mund t’ua garantojë BE-ja”, tha një protestuese.
Më 6 nëntor, kryeministri Edi Rama dhe homologia e tij italiane, Giorgia Meloni nënshkruan marrëveshje sipas së cilës, Italia do të dërgojë në Shqipëri emigrantët që shpëton në Detin Mesdhe, ndërsa Italia do të financojë ngritjen e qendrave për pritjen e tyre. Marrëveshja do të nisë së zbatuari pranverën e vitit të ardhshëm.
