Me mbërritjen e koronavirusit në vendin tonë, ashtu si në vendet e tjera, edhe qeveria vendosi të kufizonte qarkullimin e makinave dhe këmbësorëve në kuadër të masave për parandalimin e Covid-19.
Kjo jo vetëm që ka bërë të mundur kufizimin e pandemisë, por ka shënuar një rënie të aksidenteve.
INSTAT raporton se në muajin mars numërohen 65 aksidente rrugore nga 127 aksidente të ndodhura në muajin mars të një viti me parë, duke u ulur me 48,8 %, krahasuar me të njëjtën periudhë të një viti më parë.
Sa i përket numrit të të aksidentuarve (të vrarë dhe të plagosur) në mars u regjistruan 94 persona nga 176 që ishte një vit më parë, duke u ulur me 46,6 %, ndërsa në tremujorin e parë të vitit 2020, është 360 persona nga 483 persona, duke u ulur me 25,5 %, krahasuar me të njëjtën periudhë të vitit 2019.
Kështu, në tremujorin e parë të 2020, numërohen 264 aksidente rrugore nga 356 aksidente të ndodhura në tremujorin e parë të 2019, duke u ulur me 25,8 %, krahasuar me të njëjtën periudhë të një viti më parë.
Sipas statistikave në mars 2020, numri i të vdekurve nga aksidentet rrugore është 10 persona nga 24 persona të vdekur në të njëjtën periudhë një vit më parë.
Nëse n 2019 numri më i lartë i aksidenteve është kryer nga grup-mosha 25–34 vjeç, duke zënë 35,4 % të numrit të aksidenteve gjithsej, në 2020 aksidentet në këtë grup-moshë janë ulur me 28,1 %.
Në tremujorin e parë të 2020, aksidentet rrugore, në 21,6 % të rasteve, kanë ndodhur si pasojë e sjelljes së këmbësorit dhe kështu numri i aksidenteve sipas sjelljes së këmbësorit është ulur 1,7 % krahasuar me një vit më parë.
