Mjeku i njohur Pëllumb Pipero ka folur gjatë një interviste në “AbcNews”, për rastin e parë me Covid-19 te Spitali Infektiv.
Pipero u shpreh se kishin qenë tepër të frikësuar, por brenda pak ditëve ishin mësuar me situatën dhe çdo gjë e kishin marrë në dorë që në momentet e para për rastet në vazhdim.
Gazetari Juli Xhokaxhi e pyet mjekun Pëllumb Pipero:
“Si ishte mbërritja e pacientit të parë me koronavirus tek ju në Spitalin Infektiv, ishte e frikshme”?
“Shokuese, kur shefja e shërbimit tha se mbrëmë në mesnatë ishin shtruar 2 pacientë me koronavirus, ne shihnim njëri-tjetrin.
Po mendonim ku do gjenim vrimë të futemi tani, por brenda pak ditëve u mësuam.
Ishim edhe të trajnuar.
Ne u trajnuam për dy javë rresht se si ta përballonim rastin e parë, improvizonim ditë për ditë. Emocioni dhe frika janë njerëzore, nuk mund të bëjmë trimin.
Në fund të fundit kemi bërë një detyrë të shenjtë dhe mendoj se kemi qenë të privilegjuar.
Nëse në fillim të kësaj situate donim 20 deri në 30 minuta për tu orientuar e rastin, tashmë për dy minuta orientohemi menjëherë, tani e dinë cfarë të kërkojnë.
Nëse në fillim kërkonim gjithçka, tani kërkojmë atë që duhet”, përgjigjet Pipero.
Por mjeku ka shtuar se pavarësisht rasteve të shtuara ditët e fundit, situata mbetet pozitive.
“Ky virus, ndryshe nga të tjerët, varet shumë rëndesa e sëmundjes, nga koha e ekspozimit ndaj virusit.
Sa më shumë të ekspozohesh në një ambient të infektuar aq më rëndë sëmuresh.
Koha e ekspozimit ndaj virusit është shumë e rëndësishme, mosha është shumë e rëndësishme, të sëmurët kronikë janë shumë të rëndësishëm.
Mund t’ju them që kjo pandemi na ka dhënë mësime që do të mbeten në histori”, u shpreh Pipero.
