Një i dërguar i kryeministrit Rama nga Libia po ndërmjetëson në Siri për lirimin 80 shqiptarë mes tyre 51 fëmijë, që gjenden në kampin Al-Hol. Burime të Gazetës Reforma deklarojnë se delegacioni kryesohet nga Këshilltari i Kryeministrit Rama për çështjet e Lindjes së Mesme dhe Konsull Nderi i Shqipërisë për Libinë, Sirinë dhe Jordaninë, Mark Gharib. Ai shoqërohej nga drejtori i Antiterrorizmit i Policisë së Shtetit, Gledis Nano dhe zëvendësi i tij Endrit Doda.
Takimet
Delegacioni u prit në Departamentin e Marrëdhënieve të Jashtme në qytetin e Qamishlo, nga presidenti Abdul Karim Omar, dhe nënkryetari i presidencës, Fanar Kaait, dhe një numër anëtarësh të organit administrativ të Sirisë Verilindore, e cila qeveriset nga Forcat Demokratike kurde, aleatë të SHBA-ve në Siri.
“Të dy palët shkëmbyen mendime mbi aspekte të ndryshme politike, të sigurisë dhe të shërbimit, kushtet e kampit dhe mjetet e bashkëpunimit për të luftuar terrorizmin”, deklaron një burim zyrtar sirian. Prej gati 1 muaji, qysh nga vizita e Lleshajt, strukturat e antiterrorit shqiptar vijojnë të qëndrojnë në Liban për të bërë të mundur rikthimin e grave dhe fëmijëve nga ky kamp.
Amnistia
Delegacioni është në një kohë të favorshme për të riatdhesuar fëmijët shqiptarë. Më 12 tetor 2020, Këshilli i Drejtësisë i Sirisë Veriore dhe Lindore ka njoftuar një amnisti për të burgosurit dhe po punon për një tjetër amnisti për banorët sirianë të Camp Al-Hol.
Shumë të burgosur në Sirinë Veriore dhe Lindore do të lirohen përmes një amnistie të përgjithshme ose do të përgjysmohen dënimet e tyre, ka njoftuar Administrata Autonome e Sirisë Veriore dhe Lindore.
Të dënuarit që marrin amnisti kanë 60 ditë kohë për t’u dorëzuar dhe për të përfituar nga falja. Po ashtu, sipas vendimit, do të lejohen të largohen familjet e tyre, gratë dhe fëmijët.
KB janë të shqetësuar për gjendjen e më shumë se 64,000 njerëzve që jetojnë në kushte të vështira humanitare në kampin Al Hol në veri-lindje të Sirisë, veçanërisht gratë dhe fëmijët, të cilët përbëjnë rreth 94 përqind të popullsisë.
Ka rreth 34,000 fëmijë nën moshën 12 vjeç në Al Hol. Më shumë se 120 prej tyre janë të pashoqëruar ose të ndarë nga familjet e tyre dhe jetojnë në një qendër të përkohshme të kujdesit në kamp.
Në muajin e kaluar, shoqatat humanitarët kanë shprehur alarmin për përkeqësimin e situatës së sigurisë në kamp pas një rritje të incidenteve të dhunshme. Përveç kësaj, për COVID-19 testimi është relativisht i kufizuar dhe një shpërthim më i gjerë mbetet një rrezik domethënës.
Në dy muajt e fundit, më shumë se 1.000 njerëz – kryesisht familje siriane të zhvendosura, por edhe shtetas nga vende të tjera – raportohet të kenë lënë kampin. Këtu përfshihen 16 fëmijë rusë, një britanik dhe një fëmijë kanadez, për të cilët u raportua se ishin riatdhesuar në vendet e tyre.
KB thekson se çdo largim duhet të jetë vullnetar, i sigurt, plotësisht i informuar dhe dinjitoz dhe në interesin më të mirë të fëmijëve.
Dareen Khalifa i Grupit Ndërkombëtar të Krizave paralajmëroi pasoja të mundshme negative. “Një lëshim i pakoordinuar do të ishte i dëmshëm,” tha ajo. “Nuk ka ndonjë program serioz në verilindje të Sirisë që ndihmon në riintegrimin e familjeve të lëshuara, qoftë duke siguruar mbështetje sociale ose shëndetësore mendore.”
Siguria
Në kampin A-Hol këtë muaj, sipas raportit zyrtar, ka patur 6 sulme të kryera nga anëtaret femra të ISIS. Këto 6 sulme rezultuan në 7 lëndime dhe 2 vdekje, një me varje dhe një tjetër me një plumb në kokë. Kishte gjithashtu të paktën 4 përpjekje për arratisje, duke përfshirë 10 gra dhe disa fëmijë. Zyrtarët e kampit kanë deklaruar se kanë bllokuar mbi 700 përpjekje arratisjeje gjatë vitit të kaluar.
