Komisioni i Medias ka rrëzuar në mbledhjen e sotme dekretin e presidentit Ilir Meta, për kthimin e paketës “Anti-shpifje”.
Ndërkohë ditën e djeshme Komisioni Parlamentar për Veprimtarinë Prodhuese, rrëzoi të njëjtin dekret, të cilin ia kishte rikthyer Kuvendit për rishqyrtim më datë 12 janar.
Presidenca përfaqësohej nga këshilltari ligjor, Bledar Dervishi, i cili i ka bërë thirrje Kuvendit të bëjë ndryshimet e duhura.
Sipas presidentit, ky projektligj cënon lirinë e fjalës dhe shkel të drejtat e njeriut, duke rrezikuar edhe integrimin në BE.
Kujtojmë këtu se Meta e ktheu për rishqyrtim në Kuvend paktën “Anti-shpifje”, pasi Kuvendi nuk kishte publikuar përmbajtjen e akteve ligjore, duke krijuar mungesë transparence.
Ndër të tjera, presidenca thekson se ligji shkel parimet bazë të një shteti demokratik, siç është edhe liria e shprehjes dhe informimit.
Gjithashtu ndryshimet ligjore sipas argumentimit te presidencës, bien ndesh me standardet e Konventës Europiane të të Drejtave të Njeritu dhe jurisprudencën e Gjykatës Kushtetuese.
Paketa “Anti-shpifje” kaloi më 19 dhjetor në Kuvend, edhe pse ndaj saj kishte reagime të forta si nga opozita dhe komunitetet ndërkombëtare të gazetarisë.
Kundër ndryshimeve ligjore, pati edhe një protestë nga komuniteti i gazetarëve shqiptarë.
Qeveria nga ana tjetër, theksoi se paketa është konsultuar hap pas hapi me OSBE.
