Kryepeshkopi i ndjerë i Gjithë Shqipërisë, Anastas Janullatos, po përcillet sot në banesën e fundit.
Sipas dëshirës së tij, ai do të prehet në Katedralen “Ringjallja e Krishtit” në Tiranë.
Ceremonia mortore po zhvillohet në kryeqytet, e paraprirë nga mesha e përshpirtjes, e drejtuar nga Patriarku Ekumenik i Kostandinopojës, Bartolomeu.
Në këtë ngjarje të rëndësishme marrin pjesë figura të larta të politikës dhe klerit, mes të cilëve kryeministri grek Kyriakos Mitsotakis me një delegacion prej pesë ministrash, një përfaqësi nga Vatikani e drejtuar nga Sekretari i Shtetit Pietro Parolin, si dhe krerë të kishave ortodokse nga vende të ndryshme, përfshirë Patriarkun e Jerusalemit Theofil, Kryepeshkopin e Greqisë Jeronim, si dhe përfaqësues nga Qiproja, Aleksandria, Bullgaria, Rumania dhe Polonia.
Gjatë ceremonisë do të mbahen fjalime nga personalitete të ndryshme, përfshirë kryeministrin Edi Rama dhe homologun e tij grek, Mitsotakis.
Anastas Janullatos lindi më 4 nëntor 1929 në Pire dhe ka luajtur një rol kyç në rindërtimin e Kishës Orthodhokse Autoqefale të Shqipërisë, e cila ishte shpërbërë për 23 vite.
Përveç veprimtarisë fetare, ai ka kontribuar në fusha të ndryshme si shëndetësia, arsimi, përkujdesja sociale dhe zhvillimi rural. Po ashtu, ka punuar për zbutjen e tensioneve në Ballkan dhe ka qenë kandidat për Çmimin Nobel për Paqen në vitin 2000.
Janullatos ka shërbyer në organizata të rëndësishme ndërkombëtare dhe ka marrë vlerësime të shumta, si Kryqin e Madh të Urdhrit të Nderit të Republikës së Greqisë, çmimin “Athenagoras për të Drejtat e Njeriut” dhe dekoratën më të lartë të Shqipërisë “Gjergj Kastrioti – Skënderbeu”.
Kontributi i tij në dialogun ndërfetar dhe bashkëjetesën paqësore është njohur gjerësisht në mbarë botën.
