Efektivja Ina Nuka është pritur nga kryeministri Rama në zyrën e tij, pas kthimit të saj nga Turqia. Kujtojmë se Nuka iu nënshtrua një operacioni për gishtat e saj të cilat iu dëmtuan nga plasja e një kapsolli gjatë protestës së banorëve të Unazës së Re.
Rama tha se Ina u kthye pas një operacioni të suksesshëm dhe të vështirë por do të vazhdojë të shërbejë në radhët e Policisë së Shtetit.
Gjatë takimit , efektivja tha se brenda 6 muajsh do të ketë ndjeshmëri tek gishti që është implanti, ndërsa tek gishtat e tjerë do bëhet heqja e penjëve pas një jave. Në takim ishte i pranishëm dhe ministri Sandër Lleshaj i cili e cilësoi si vepër arti operacionin e Inës.
“Është vepër arti ajo që kanë bërë me implantin. Është hera e parë që mjekët tentojnë të bëjnë diçka të tillë dhe është thuajse eksperiment.”- u shpreh ai.
Efektivja Ina Nuka u shpreh se nuk dinte si ta falenderonte kryeministrin dhe nuk dinte si t’ja shfaqte mirënjohjen e thellë. Ndërkohë Rama i tha se e kanë për detyrë.
“E kemi për detyrë. Unë fola dhe me ministrin dhe ne do bëjmë një vendim qeverie për të dhënë një mbështetje financiare dhe morale që të kesh ndjesinë e solidaritetit dhe të rikuperohesh dhe më pas të ri integrohesh. Besoj do fillosh pak nga pak dhe punën. Në një detyrë më të lehtë në fillim më pas të shohim.”- tha Rama.
Kryeministri tha se presidenti Erdogan është kujdesur shumë që gjithçka të shkojë shumë mirë dhe e mbyll bisedën duke i thënë Inës një shprehje.
“Çfarë nuk të vret të forcon thotë një shprehje.” – përfundoi kryeministri.
