Kryetarja e LSI-së, Monika Kryemadhi, ka shprehur zhgënjimin për rezultatin e zgjedhjeve, ndërsa ka theksuar se beteja e tyre do të vazhdojë. Në një konferencë për shtyp, Kryemadhi u shpreh: “Mjafton të shikoni manipulimin mediatik të dy mediave kombëtare kuptohet qartë se ku është i gjithë procesi dhe media oligarkike. Administrata publike, mjafton të shikoni proceset e numërimit do të shikoni të gjithë administratën që janë vëzhgues. I gjithë procesi ishte një manipulim industrial. Ne jemi si Feniksi, nga hiri ynë do të ringrihemi dhe do ta çojmë më tej betejën tonë.
Beteja jonë nuk është për një karrige kryeministri, por për ju të rinj që të mos ikni nga Shqipëria por të rrini këtu. Është betejë që Shqipëria të jetë shtëpi e shqiptarëve dhe jo e Bangladeshit. Zhënjimin e kam pasur shumë të madh në numra, por jam e kthjellët për një gjë, ky sistem që i përgjërohet Edi Rama është një sistem që i doli boja.
Mjafton që të shikosh që LSI me 107 mijë vota merr 4 mandate, dhe një parti tjetër me 35 mijë vota merr 3 mandate. Beteja jonë vazhdon nuk do të ndalemi ne jemi me qytetarët shqiptarë që duan ndryshimin.
Sot më shumë se kurrë kemi nevojë për të shkuar para numëruesve tanë për t’ju dhënë forcë. Faktet të tjera do të vijnë njëra pas tjetrës sesi ditën e shtunë makinat me xhama të errëta kanë lëvizur në të gjithë Shqipërinë, duke shpërndarë paratë e drogës dhe krimit. Këto para nuk janë gjë tjetër veçse helmi. Të rinjtë janë kundër helmit.
Djemtë e errësirës janë më të shpejtë se djemtë e dritës, por djemtë e dritës gjithmonë fitojnë. Jemi rrëzuar, por do të ringrihemi,” tha Kryemadhi.
